चन्द्र शेखर

न्हापाया दं

वयेकःया जन्म १९२७य् पूर्वी उत्तरप्रदेशया इब्राहिमपट्टिया छगू बुंज्यामि परिवारय् जूगु ख: । वयेकलं थ:गु एम् ए डिग्री अल्लाहबाद विश्वविद्यालनं यानादिल । वयेक: विद्यार्थी राजनीतिया ईलय् छम्ह "फायरब्रान्ड" धका: नां जा: । विद्यार्थी जीवन धुंका: वयेक: समाजवादी राजनीतिइ सक्रिय जुयादिल ।^[१]

राजनैतिक जीवन

१९६२ निसें १९६७तक वयेक: भारतया च्वय् या सदन राज्य सभाया सदस्य जुयादिल । वयेकलं १९८४स भारतया पदयात्रा यानादिल गुकिइ वयेकलं भारतयात बांलाक्क म्हसीकेगु कुत: यानादिल । थ्व पदयात्रां ईन्दिरा गान्धियात मछिंकाबिल।

वयेक:या न्ह्य:याम्ह नेता भी. पी. सिंहनं राजीनामा बीधुंका: वेकलं जनता दलं छगु खलः मुंका: समाजवादी जनता पार्टी पलिस्था यानादिल। वयेक:यागु सरकारयात भारतीय राष्ट्रिय कांग्रेसं चुनाव मयाकेत समर्थन यायेधुंका: वयेकलं छगू चीधंगु बहुमतया सरकार न्ह्याकादिल । वयेक:या कांग्रेसनाप स्वापू लिपा कांग्रेस पार्टीं वयेक:यात कांग्रेसया नेता राजीव गान्धिया सुराकी या:गु आरोपं याना स्यन । कांग्रेसं वयेक:यागु सरकारयात ग्वाहालि मयायेधुंका: वयेक:या ६० सांसदया समर्थन नापं वयेकलं राजीनामा यानादिल।

प्रधान मन्त्रीया पदय् ७ला जक च्वनादीम्ह शेखरं मार्च ६, १९९१स राजीनामा बियादिल । तर वयेक: राष्ट्रिय चुनाब मजूतले तक प्रधानमन्त्रीया पदय् च्वनादिल ।

शेखरजुयात वयेक:या संसदीय वार्तालाप कलाया निंतिं सकलसियां मानय् या: । वयेक:यात १९९५य् आउटस्ट्यांडिंग पार्लिमेन्टेरियन सिरपापाखे हनात:गु दु।

चन्द्र शेखर भारतया क्वय् या सदन लोक सभाया सदस्य ख: । वयेकलं समाजवादी जनता दल (राष्ट्रिय)या नेतृत्व यानादिल । १९७७निसें वयेकलं लोक सभाया निर्वाचन ८क्वः उत्तर प्रदेशया बल्लिया क्षेत्रं त्यानादिल । वयेक: १९८४स ईन्दिरा गान्धिया तच्व:गु समर्थन दुबले जक चुनाव बूगुखः ।

शेखरजुयात मल्टिपल मायलोमा, छगू कथंया प्लाज्मा कोषया क्यान्सर जुल । मे ३, २००७य् वयेक:यात ल्वय् तच्वःया सिकिस्त अवस्थाय् अस्पतालय् भर्ना यात । वयेक:या अवस्था बांमलाना वन व आखिरे जुलई ८खुन्हु न्हु दिल्लीया अस्पतालय् वयेक: मन्त्त । ^[२]

• आधिकारिक जाःथाय् भारतीय संसदं
• चन्द्र शेखर सिकिस्त द ट्रिब्युनं