Pardias-Pietat

La prononciacion qu'ei [parˈðĩɔs] (nasalizacion de i). Las fòrmas ancianas que son Bardinae au sègle XIau, Pardies de Lissarre en 1385, Pardies de Lixarra en 1450, Pardiees de Lixarre en 1535, Pardees en 1675, Pardies (mapa de Cassini, a la fin deu sègle XVIIIau) ^[1].

Gerhard Rohlfs, citat per Grosclaude, qu'explica Pardies per lo latin parietinae, « casa arroeinada », qui a donat pardina en aragonés, « montanha dab casas rusticas, pastenc dab cabanas, lòc inculte qui sèrv de pastenc » ^[1].

Dauzat e Rostaing qu'explican Pardias sia per prata (plurau de pratum, « prat » e sufixe -ina, sia per lo latin *parietinas, derivat de paries, « paret » ^[2].

Segon Miquèu Grosclaude, la purmèra explicacion de Dauzat que harè de Pardias l'equivalent deus nombrós Pradinas, « las petitas pradas ». Mès que cau causir la segonda e la de Rohlfs. L'explicacion per Pradinas que supausaré ua metatèsi de r, mès, atau com remarca Pèire Bèc, la metatèsi de r que's hè en gascon totjorn en remontant cap au començament deu mot e jamèi dens l'aute sens (ex. capra > craba, dormire > dromir, fenèstra > frinesta). Pardias qu'ei donc l'equivalent deus pardinas d'Aragon, mot pirenenc, de *parietinas, « pastenc dab murets/murrets ^[1]. Pr'amor deu semantisme larg de l'eretèr de *parietinas, la question de son sens precís dens lo cas de la localitat bearnesa que demora drubèrta.

Pietat que correspón au nom d'ua capèra deu sègle XVIIau, dedicada a la Verge ^[1].Lissare o Lixarra qu'ei l'ancian nom d'ua partida de las comunas la plana de Nai. Qu'ei un nom basco qui ei lo medish que lo d'ua anciana comuna soletina aplegada dab Maulion. Segon J.B. Orpustan, lo nom ei pas lizarra, « los hrèishos », mès meilèu lex-t-aurre, « au davant deu flume », qui correspón a la situacion d'aqueras comunas près deu Gave de Pau ^[1].

• Comunas deus Pirenèus Atlantics

• Portau de Bearn