Umanista, matemàtich e architet. Leon Battista Alberti a l'era nassù a Génoa ël 18 ëd fërvé dël 1404 an na rica famija d'adoss fiorentin-e; a la mòrt ëd sò pare, la famija ëd chiel-sì a l'ha bandonalo.
Alberti a l'ha peui studià a Pàdoa.Dal 1432 al 1434 a l'ha vivù a Roma, peui a Bològna, Màntoa e Fërara.A parte dal 1443 a l'é restà dzortut a Roma.
Alberti a l'é stàit consejé ëd vàire riche famije prinsipësche. Tanme architet, a l'é stàit pì teòrich che costrutor; tutun as devo a chiel Palass Rucellai a Firense, ël Templi dij Malatesta a Rìmin, la cesa ëd Sant Andrea a Màntoa e la fassada dla cesa ëd Santa Marìa Novela a Firense. Dotà an efet për tute le dissiplin-e, dël 1435 ant ël De pictura a l'é stàit ël prim umanista a traté da na mira teòrica la prospetiva, an ëstudiand lòn ch'a vëd l'euj.Ij sò travaj a son peui stàit continuà da Piero della Francesca, Lambert e Taylor.