الگین، مورے

اس شہر کے نام کا مطلب وہاں کی کیلٹک زبان کے مطابق ”خوبصورت جگہ یا وادی“ ہے۔ ایک اور خیال کے مطابق الگین کا نام ایلگ (ealg)سے نکلا ہے جس کا مطلب ”قابل قدر“ ہے۔ کچھ مقامی لوگ اسے آئرلینڈِ صغیر (Little Ireland) بھی کہتے ہیں۔

یہاں 1923ء میں نویں صدی کا ایک ستون دریافت ہوا جس سے ظاہر ہوتا ہے کہ اس شہر کی تاریخ کافی پرانی ہے۔ اگست 1040ء میں میک بیتھ کی افواج نے دُنکان اول کو الگین کے قریب شکستِ فاش دی اور قتل کر دیا۔ شاہ ڈیوڈ اول کے دورِ حکومت میں lady hill کے مقام پر قلعہ تعمیر کروایا گیا جو آج بھی اس دور کی یاد تازہ کرتا ہے۔ انگلستان کے شاہ ایڈورڈ اول نے دو بار الگین کا دورہ کیا اور وہ اس جگہ سے اتنا متاثر ہوا کہ اس نے اس قصبے کو bon chastell et bonne ville یعنی ”اچھا قلعہ اور اچھا قصبہ“ کا خطاب دیا۔

اپریل 2021ء میں الگین کرونا وائرس کا گڑھ بنا رہا، جہاں اسکاٹ لینڈ کے دیگر علاقہ جات کے مقابلے میں چار گنا لوگ متاثر ہوئے۔ جب ویکسینیشن مہم کا آغاز کیا گیا تو ماسوائے الگین کے، تمام علاقوں مین انفیکشن کا پھیلاؤ کم ہو گیا۔ مئی 2021 کو الگین کے نو منتخب رکن پارلیمنٹ بھی کرونا کے باعث اجلاس میں شامل نہ ہو سکے۔^[6]

موسمی اعتبار سے الگین میں نہ ہی شدید گرمی پڑتی ہے اور نہ ہی سردی جس کی وجہ سمندر سے قربت ہے۔ سردیوں میں درجہ حرارت صفر ڈگری سے زیادہ نہیں گرتا اور نہ ہی گرمیوں میں 18 ڈگری سے اوپر جاتا ہے۔

نصف سے زائد آبادی مسیحیوں پر مشتمل ہے، جن میں سے زیادہ تر چرچ آف سکاٹ لینڈ سے وابستہ ہیں، جبکہ دیگر مذاہب اور قومیتوں کے لوگ خال خال ہی نظر آتے ہیں ۔

یہ آسٹریلوی طبیب سر ڈیوڈ ہارڈی کی جائے پیدائش ہونے کے ساتھ ساتھ سابق فٹ بالر اسٹیفن پریسلے کا بھی آبائی شہر ہے ۔

مشہور اداکار، ہدایت کار اور گلوکار کیون مک کڈ(Kevin McKidd) بھی 1973 ء میں الگین میں پیدا ہوئے۔