ელიას კანეტი

ელიას კანეტი (ინგლ. Elias Canetti; დ. 25 კვირკვე, 1905, რუსე, ბულგარეთი — ღ. 14 მარაშინათუთა, 1994, ციურიხი, შვეიცარია) — გერმანულნინამი ჭარუ დო დრამატურგი, ნობელიშ პრემიაშ ლაურეატი ლიტერატურაშ დარგის 1981 წანას.

ელიას კანეტი
დაბადებაშ თარიღი:	25 კვირკვე, 1905
დაბადებაშ აბანი:	რუსე, ბულგარეთი
ღურაშ თარიღი:	მარაშინათუთა 14, 1994 (89 წანერი)
ღურაშ აბანი:	ციურიხი, შვეიცარია
საქვარუა:	ჭარუ, დრამატურგი
Magnum opus:	მასა დო ხეშულობა (1960)
ნინა:	გერმანული ნინა
ჯილდოეფი:	ფორმენტორიშ პრემია (1949) ავსტრიაშ დიდი სახენწჷფო პრემია (1967) ავსტრიაშ საპატიო შანი მენცარობეფიშო დო ხელუანობეფიშო (1972) გეორგ ბიუხნერიშ პრემია (1972) ნელი ზაქსიშ პრემია (1975) გოტფრიდ კელერიშ პრემია (1977) იოჰან პეტერ ჰებელიშ პრემია (1980) ნობელიშ პრემია ლიტერატურას (1981) ფრანც კაფკაშ პრემია (1981)

კანეტიშ არძაშე უმოსო შანულამი ნახანდი რე მასა დო ხეშულობა, ნამუქჷთ 1960 წანას გიშართჷ დო ავტორს პოპულარობა მოუღჷ. წინგის ეჭარილი რე მასაშ, აგვართაშ ფსიქოლოგია დო ჸეთი ბაძაძეფი - მუშენ დუთმაჸუნუნა თინეფი ხეშულობას. წინგის მოჩამილი რე დანიელ პაულ შრებერიშ მემუარეფიშ ანალიზი დო თაშნეშე, გაკრიტიკებული რე ზიგმუნდ ფროიდიშ დო გუსტავ ლე ბონიშ იდეეფი. კანეტიშ შხვა ნახანდეფიშე ეიოშინალი რე: პოტიკიშ კომედია (1934), დაჸვერება (1935), თინეფიშ დღალეფი თვალირი რე (1956), მარაკეშიშ ხონარეფი (1968), ადამიერიშ პროვინცია (1972), ზიტყვეფიშ სვინდისი (1975), დუდიშული ნინა (1977), ჸუჯიშ ნოთე (1980), ჭანდეფიშ აგონია (1992) დო შხვეფი.

ელიას კანეტიქ დებადჷ ბულგარეთიშ ნოღა რუსეს, ურიეფიშ ფანიას. გურაფულენდჷ ქიმიას ვენაშ უნივერსიტეტის, სოდეთ თხილუ ოდოქტორე დისერტაცია 1929 წანას, მარა მუში პროფესიათ დღას ვაუმუშებუ. ჭარალუათ ორდოიანი წანეფიშე დეინტერესჷ. მაართა ნაწარმებეფი 1930-იან წანეფს გჷმაბჟინუ. 1940-იანი წანეფიშე კანეტი ბრიტანეთის ცხოვრენდჷ. 1970-იან წანეფს ოცხოვრებშა გეგნორთჷ ციურიხიშა, სოდეთ ღურაშახ ქუდოსკიდჷ.

ელიას კანეტი ნობელიშ პრემიაშ მოხ რდჷ შხვადოშხვა პრესტიჟული პრემიეფიშ დო ჯილდოეფიშ ლაურეატი. თაშნეშე, კანეტი რდჷ მანჩესტერიშ დო მიუნხენიშ უნივერსიტეტეფიშ საპატიო დოქტორი.