第7屆俄羅斯下議院選舉

9月13號，俄羅斯總統普京同總理梅德韋傑夫，一齊去咗大諾夫哥德，同當地民眾交流。兩個人跟住當地漁夫，搭漁船到伊爾門湖去捉魚。但係佢哋冇幫手捉魚，只係企響隔離睇漁夫收網，普京睇嚟對捉返嚟嘅魚好開心。返翻岸邊之後，兩個人同民眾圍住營火，飲啱啱新鮮煮好嘅魚湯。普京讚當地風光好靚，又應承會支持當地漁業，去幫漁民解決問題。兩個人呢次去大諾夫哥德，係為執政統一俄羅斯黨，響即將舉行嘅俄羅斯下議院國家杜馬選舉拉票造勢^[1]。

俄羅斯中央選舉委員會公布，執政統一俄羅斯黨響下議院國家杜馬選舉入面攞到五成四選票，響四百五十席入面攞到三百四十三席，同原先嘅二百三十八席增加超過一百席，維持最大黨嘅地位，可以繼續掌控住下議院。排第二嘅共產黨攞到議席比上屆少咗超過一半，只有四十二席，自由民主黨就有三十九席^[2]。

統一俄羅斯黨響今次選舉攞到壓倒性贏出，能夠自行響國會通過修憲，而且其餘攞到議席嘅政黨都傾向支持政府。今次選舉結果將有利政府施政、鞏固普京權力同佢兩年之後競逐連任嘅勝算。至於反對派政黨冇一個能夠躋身到下議院，佢哋話投票率低不利選情。今屆投票率只有四成八，比上屆跌咗差唔多十二個百分點。領導統一俄羅斯黨嘅總理梅德韋傑夫同總統普京響點票結束之前就率先宣布贏出。普京話儘管經濟唔掂，社會重有好多未解決嘅問題，但統一俄羅斯黨響選舉入面攞到非常好嘅成績，反映民眾重相信政府^[2]。

投票期間，俄羅斯獨立選舉監察組織收到超過二千宗有關違反選舉規則嘅投訴。響俄羅斯南部，有安裝響票站嘅鏡頭影到票站職員將多張紙揼入票箱。響北高加索地區亦有記者影到類似情況。有民眾連續將幾張紙揼入票箱，重有票站傳出有人不停投票。中央選舉委員會話，部分票站結果可能會被取消，會盡快做進一步調查^[2]。