第2屆不丹國民議會選舉

根據2008年頒布嘅《不丹王國選舉法》規定，國民議會一定要喺上屆任期結束之後嘅90日內舉行選舉^[3]。由於喺2008年選出嘅國民議會任期去到2013年4月20號，所以不丹要喺90日內（即係7月20號之前）選出新一屆嘅國民議會議員^[4]。

選舉係兩輪投票制，喺第一輪投票入面，政黨都會派人出嚟參加全國二十個宗嘅初選。攞到最高票數嘅兩個政黨就可以喺第二輪選舉入面派出候選人，去爭國民議會入面47個議席^[1]。

不丹今次選舉有381,790人登記咗成為選民^[5]。政府將第一輪投票舉行嘅日子定喺公眾假期，所有商店嗰日都唔開得門做生意^[6]。喺呢次選舉入面印度畀咗不丹四千幾部電子投票機，方便不丹快速點票^[7]。

參與呢之選舉嘅政黨有四個，包括執政黨不丹繁榮進步黨、同埋反對黨人民民主黨，以及兩個分別係Druk Nymrub Tshogpa同Druck Chirwang Tshogpa嘅新政黨，呢兩個政黨都係由女性嚟做黨主席^[8]。除咗上面四個政黨之外，其實重有一個政黨諗住參選，但係派唔出一個有大學學歷嘅候選人出嚟去不丹北部加薩宗參選；雖然另外四個政黨都同選舉委員會求請，希望選舉委員會畀呢個政黨參加呢次選舉，但係不丹選舉委員會都係裁定佢提名冇效^[2]。呢個黨嘅黨魁索南（Sonam Tobgay）就話：「四個政黨同第五個冇權參選嘅政黨申訴嘅事喺世界上、國際上都係一件史冇前例嘅事，係一件特別、尊貴嘅事」^[2]。

人民民主黨喺政綱入面提出要加強不丹同印度嘅關係，而中央政府亦都要將權力下放畀人民同地方政府嘅手上^[9]。外面認為，印度喺競選活動期間停咗畀不丹嘅能源補貼措施，係為咗懲罰不丹諗住同中國搞好關係嘅執政黨^[9]。印度停咗補貼冇耐，不丹嘅能源價就係咁坐火箭升高，令到印度同不丹之間嘅關係變咗呢次選舉嘅重要議題^[10]。人民民主黨藉以呢件事批評執政黨（不丹繁榮進步黨）決策唔掂，令到不丹同印度嘅關係急速惡化^[11]。經濟問題亦都係呢次選舉入面另一個重要嘅議題^[12] ，而政治評論家旺迪則同法新社記者話，不丹人唔滿意政府冇改善國家經濟唔掂嘅情況^[13]。

分析

半島電視台嘅新聞話，人民民主黨喺呢次選舉入面意外咁贏出^[14]。

選舉結束之後嘅第十日，選舉委員會會開始處理選舉投訴，又畀人稱為「請願期」；喺「請願期」結束之後^[15]，廷禮就會成為不丹總理，可以穩人組成新政府^[9]。而今次攞到國民議會議席嘅女性有三個，當中人民民主黨嘅多爾吉（Dorji Choden）有望成為不丹歷史止第一位女大臣^[15]。

印度總理辛格向贏出選舉嘅人民民主黨祝賀，並保證印度會繼續支持不丹^[9]。