Amerikaanse Nasionale Filmregister

Gedurende die 1980's het verskeie prominente rolprentvervaardigers en ander in die filmbedryf in die Verenigde State, soos Frank Capra en Martin Scorsese, by die Amerikaanse Kongres gepleit om 'n wetsontwerp op die bewaring van film in te stel om kommersiële wysigings (soos skandering en redigering vir TV) van klassieke films te vermy. In reaksie op die kontroversie oor die inkleur van oorspronklik swart en wit rolprente spesifiek in daardie dekade, het Robert J. Mrazek en Sidney R. Yates die Amerikaanse Nasionale Filmbewaringswet van 1988 tertafel gelê. Dit het die Amerikaanse Nasionale Filmregister tot stand gebring en die kriteria vir die keuse van films vir bewaring vasgestel. Die Wet is aangeneem en die NFR se missie is daarna bevestig deur verdere Kongressionele wette tussen 1992 en 2016.^[3][4][5] Die Amerikaanse Nasionale Filmbewaringsraad se missie is om die voortbestaan, bewaring en verhoogde publieke beskikbaarheid van Amerika se filmerfenis te verseker.^[6] Die 1996-wet het ook die nie-winsgewende Nasionale Filmbewaringstigting geskep wat, hoewel dit by die Film Publikasie Raad geaffilieer is, geld van die privaatsektor insamel.

Die filmbewaringsraad voeg tot so veel as 25 films elke jaar by die register wat as "kultureel, histories of esteties betekenisvol" beskou kan word sodat die omvang en diversiteit van die Amerikaanse film erfenis ten toon gestel kan word en om bewustheid vir die bewaring daarvan te verhoog. 'n Film kom in aanmerking vir insluiting tien jare na sy oorspronklike vrystelling. Vir die eerste keuring in 1989 het die publiek byna 1 000 genomineer films vir oorweging voorgelê. Lede van die filmbewaringsraad het toe individuele stembriewe ontwikkel sodat gestem kan word vir die moontlike insluiting van rolprente. Die stembriewe is in 'n tabel van 25 films saamgestel wat toe deur die kongressionele bibliotekaris, James H. Billington, en sy personeel by die Biblioteek gewysig is vir die finale keuring. Sedert 1997 kon lede van die publiek tot 50 films per jaar nomineer vir oorweging.

Die register sluit rolprente in wat wissel van klassieke Hollywood films tot weesfilms, waar die vervaardiger die film, of regte tot die film, opgegee het.^[7] Daar word nie van 'n rolprent vereis om vollengte te wees nie, en dit hoef ook nie in die tradisionele sin teatraal vrygestel te wees nie. Die register bevat nuusberigte, stil films, studentefilms, eksperimentele films, kort films, musiekvideo's, films buite kopieregbeskerming of in die publieke domein, narratiewe speelfilm (storie of drama-tipe), rolprentreekse, tuisfilms, dokumentêre films, animasie en onafhanklike films. Vanaf die 2023-notering is daar 875 films in die register.

Ouderdom van gekose films

Die oudste rolprent in die register is Newark Athlete wat in 1891 vrygestel is, terwyl die mees onlangse, 12 Years a Slave en 20 Feet from Stardom, elk in 2013 vrygestel is.

Mardi Gras Carnival, wat in 1898 vrygestel is, is in Desember 2022 gekies is, het met 124 jaar die langste gewag om opgeneem te word, hoewel as mens in ag neem dat die film reeds amper 'n eeu oud was voordat die register gestig is, was die "wag" tegnies net 33 jaar. Raging Bull, wat op 19 Desember 1980 in die Verenigde State uitgereik is, is in Oktober 1990 opgeneem en hou die rekord vir die gouste opname in die register, effens minder as die vereisde minimum van 10 jaar. Slegs agt ander rolprente is by die tienjaarmerk by die register gevoeg, onder andere Goodfellas,^[8] Toy Story,^[9] Fargo,^[10] en 12 Years a slave.

Die lys is in 2023 bygewerk, en daar is heelwat van die films wat maklik beskikbaar is om na te kyk op die internet, soos hier onder gelys, of by 'n spesiale vertoningskamer by die register se hoofkwartier in Amerika.

• Volledige lys van films wat opgeneem is in die register
• Amerikaanse Nasionale Film Register, en 'n lys van films beskikbaar vir besigtiging op die webtuiste.
• Amerikaanse Kongresionele biblioteek, met 'n lys van films beskikbaar vir besigtiging op die webtuiste.
• Films beskikbaar op Youtube.
• Films beskikbaar op die Internet Argief.