213

dr Germanechrieg und d Froog vo de Alemanne

• Im Summer isch Chrieg zwüsche de Röömer und de Germane. Me dänkt, es sigen uf dr Syte vo de Germane d Alemanne gsii.
• Dr römisch Senator und Gschichtschryber Cassius Dio verzelt als Zytgenoss i sym Buech Römische Geschichte,^[1] wie deil Forscher dänke, s erschte Mol öpis vo den Alemanne.^[2] Es isch e grossi Stammesgruppe, wo e Zämeschluss vo de früenere Stämm vo de Semnone, de Suebe, de Chatte un de Jutunge isch, wo früener e Deil vo den Elbgermane gsii sin. Es git e rächti Kontrovärse zu den erschte gschichtleche Züügniss vo den Alemanne.^[3]
• Öpen i dere Zyt isch dr Afang vo de nöie germanische und bsunders de alemannische Chriegszüüg übere römisch Limes. Sid denn mache germanischi Stämm immer wider röiberischi Züüg dur s römische Land am Schwarzwald, und die römische Landgüeter und Dörfer wärden überfallen und usplünderet.
• Dr römisch Kaiser Caracalla chunt sälber über d Alpe id Provinze Räzie und Obergermanie zum dr Kampf vo dr römischen Armee z leite. Bim Chrieg i dr Gägend vom Main chunt’s für d Röömer guet use, und drum het dr Caracalla jetz au dr Eeretitel Germanicus maximus.
• Me verzelt, dr Caracalla heig uf sinere Reis in Norde au s berüempte Heiligtum vom Apollo Grannus i de Vogeese psuecht.^[4]
• Am 6. Oktober wird z Rom dr Siig über d Germane – d victoria Germanica – gfyyret.
• Em römische Kaiser, wo Marcus Aurelius Severus Antoninus gheisse het, het schynts bi sim Chrieg nördlech vo den Alpe die germanischi Tracht, e Mantel, wo Caracalla heisst, so guet gfalle, ass er se au z Rom gärn immer wider agleit het; das isch dr Grund, wurum me iim denn dr Name Caracalla gää het.

und was suscht no bassiert isch

• Dr Caracalla loot dr Gouvernöör vo dr südgallische Provinz lo tööde.
• Dr Zephyrinus isch Bischof vo Rom.
• Dr griechisch Filosoof, Sproochforscher und Lexikograaf Cassius Longinus chunt uf d Wält.
• Z China isch Chrieg.
• Dr Cao Cao wird König vom chinesische Rych Wei.
• Z Rom goot dr Bou vom riisige Caracalla-Baad wyter.
• Im Partherrych isch Chrieg. Dr Artabanos dr Vierti wird König vo de Parther.