Corina Gredig
Corina Gredig (* 8. Septämber 1987 z Züri; haimetberächtigt z Schänke LU) isch e Schwyzer Bolitikeri (glp). Si isch Mitgliid im Nazionaalroot[1] un Co-Bresidänti vu ire Bartei im Kanton Züri. Si laitet dr Thinktank glp lab.
.jpg)
Familie, Uusbildig un Beruef
D Gredig isach as eltschts vu drei Chinder z Binz im Kanton Züri ufgwagse.[2] Anne 2003 het si an dr Schueler*nebrotescht gege dr Iraakchrieg mitgmacht. Si het d Handelsmittelschuel an dr Kantonsschuel Hottinge un derno het si ne Bankleer gmacht. Noch ere Backpacktour dur d Wält het si bschlosse z studiere un uf uf Lausanne gange un het dert d Passerelle fir d Zuelossig an d Universiteet absolviert, näbehär het si im Finanz un Bildigberaich schafft. An dr Universiteet Züri het si Bolitikwisseschafte, Volkswiirtschaft un Räächt studiert un ire Studium mit ere Masteraarbet zum Thema «Digitale Demokratie» abgschlosse.[3] Si läbt z Züri im Quartier Riesbach un het zwai Chinder (* 2011 un * 2015).[2]
Politik
D Gredig isch syter anne 2010 Mitgliid vu dr Grienliberaale Bartei. Vu 2010 bis 2013 het si d kantonaal GLP-Sekretariaat gfiert. 2011 het si dr Kantoons- un Nazionaalrootswaalkampf glaitet.[4] un isch Gschäftsfiereri vu dr Bundeshuusfrakzioon woore.[5] Im Joor 2015 het si mit dr Nazionaalreeti Kathrin Bertschy s glp lab grindet,[6] wu si bis hite laitet. Si gheert zue re Gruppe um d Bertschy un dr GLP-Bresidänt Jürg Grossen, wu fir di nazionaal Bartei e zytgmäässi, nithierarchischi Organisazioonsfoorm entwickle duet.[7] 2018 isch si mit ufeelig vyl Panaschierstimme[8] in Stadtzürcher Gmairoot gweelt woore. Am 20. Novämber 2018 het d Mitgliiderversammlig d Gredig zäme mit dr Nicola Forster aistimmig zue dr Co-Bresidänti vu dr Zürcher GLP-Kantonaalbartei gweelt.[9] S Duo will d Bartei nei ufstelle un jingeri un digitaal affiini Weelersegmänt aaspräche.[3] Derzue chunnt d Absaag an s Links-räächts-Scheema, wu d Gredig di bolitisch Frontliinie zwische progressiive un konservatiive Chreft entgeegestellt.[10] D Forster un d Gredig hän d GLP im Meerz 2019 zue me Waalsiig bi dr Kantoonsrootswaele gfiert, d Gredig het en Sitz im Zürcher Kantoonsroot erooberet.[11][12] D Mitgliiderversammlig vu dr GLP Kantoon Züri het am 25. Juuni 2019 d Lischt fir d Nazionaalrootswaale verabschiidet un d Corina Gredig hinter dr baide bishäärige Nazionaalreet*ene Tiana Angelina Moser un Martin Bäumle uf dr dritt Lischteblatz gsetzt.[13] Am 20. Oktoober 2019 isch d Gredig in Nazionaalroot gweelt woore.
Weblink
Commons: Corina Gredig – Sammlig vo Multimediadateie- Websyte vu dr Corina Gredig
- Corina Gredig uf dr Websyte vo dr Bundesversammlig
- Interässebindige vu dr Corina Gredig uf lobbywatch.ch
- d Corina Gredig bi dr GLP
- d Corina Gredigs bim Gmairot Züri
- Nicole Soland: Fürs «Rütli des 21. Jahrhunderts», P.S. Zeitung, 7. Oktober 2019
Fuessnote
 | Dä Artikel basiert uff ere fräie Übersetzig vu dere Version vum Artikel „Corina_Gredig“ vu de dütsche Wikipedia. E Liste vu de Autore un Versione isch do z finde. |