Dani Arnold

De Dani Arnold isch im Ürner Bärgdorf Biel im Schächetal üfgwagsä.^[2] Är isch sehr bekannt wordä, will är en Gschwindigkeitsrekord bi de Bestiigig vu de Eiger-Nordwand 2011 gmacht het. Är het d Wand ellei i 2 Stundä und 28 Minütä durstigä und isch drum 20 Minütä schnäuer gsi als de bisherig Rekordhauter Ueli Steck, wo de aber im 2015 em Arnold si Ziit um 6 Minütä unterbotä het.^[3][4]

I de Chlättrszenä isch de Arnold bereits vor 2011 bekannt gsi. Under anderem ai dur de Speedrekord vu 1 Stund und 35 Minütä am Westgrat vum Salbitschijen. Und witers isch es ihm 2010 glungä mit em Stephan Siegrist und em Thomas Sänf die erst Winterbestiigig vum Torre Egger z Patagoniä.

Im Jänner 2012 isch de Arnold z Schottland d Mixed-Chlätterrütä The Hurting als erste Nid-Schott Rotpunkt gchlätteret. The Hurting giutet als eini vu de wältwiit schwärste Trad-Miced-Chlättärrütä iberhaipt.^[5]

Im April 2013 isch äs ihm mit em David Lama glungä, d Erstbegehig vu de zentralä Headwall a de 1500 Meter hohe Ostwand vum Moose’s Tooth z Alaska. Das Duo het fir die Rütä, wo me Bird of Prey nennt, (6a, M7+, 90°, A2) rund 48 Stunde brüücht.^[6]

Am 22. April 2015 isch ihm di schnäuschti Solobegehig vu de Matterhorn-Nordwand i 1 h 46 Minütä glungä.

De Arnold isch en Bärgfüerer, verhiiratet und läbt z Birglä.^[2]

• Persenlechi Website