Froschkuttelessa
| Dialäkt: Schwäbisch |
S Froschkuttelessa isch e traditionell Essa an dr Fasnet en Riadlenga. S Froschkuttelessa kennt ma nemme blos em Ländle. Wega dr hoha Polidik[1] ond wega dr Kunscht[2] isch es en dr ganza Rebublik bekannt worra.
Rezept
Dia Froschkuttla send oigentlich Kuttla ond a baar andere Doil vo de Innereia. Für Saure Kuttla nemmt mas Floisch vom Labmaga, schneidets en Stroifle, 2*30 mm ond kochat se bis se woich send (a Stond). Fir da Gschmack nemmt ma a Lorbeerblättle, Wacholderbeera ond a bissle Salz ond Pfeffr. Wenn se gar send, griaget se a Mehlschwitz. Wemm'r se sauer mog, nemmt ma a bissle Essig oder an Woi (en reacht saura, wia da Reitlenger).[3] Fir Froschkuttla ka mr no andrs Floisch wia Lebr, Nierle ond Herz dazua nemma. Abr do muas ma wega de onterschiedliche Garzeita aufbassa. Ausser zur Fasnet en Riadlenga geit's dia Kuttla au als oifachs Essa drhoim.
Riadlengr Froschkuttelessa
En Riadlenga wird des Essa am Fasnetsdienstag von de Gole[4] inszeniert. Dia Gole send d Riadlenger Fasnetstreiber (se send abr au suscht wia Hoimatverei aktiv). Des Froschkuttelessa isch nemlich blos a Stick vo dr Zeremonie. Davor marschieret dia Herra (ja, blos Herra!) durch Riadlenga, nocher essad se ond miassad drnoch auf anara Rutschede aus em ersta Stock vom Rothaus rutscha. Drnoch gangat dia Herra no in a Boiz. Zom 11. 11. veraschdalded d Gole no a klois Froschkuttelessa.
Weblink
- Andre Projäkt
Commons: Saure Kuttla – Sammlig vo Multimediadateie- Allgmoi
- Kretschmann beim Froschkuttelnessen in Riedlingen. Abgruefen am 7. März 2019. (mid ama Video)