Die Grüen Linie
Die Grüen Linie isch e Waffestillstandslinie zwüsche Israel und em Westjordanland, em Gasasträife, de Golaanhööchene und dr Sinai-Halbinsle und en andere Begriff für d Demarkationslinie us em Waffestillstandsabkomme vo 1949.[1] Dr Naame wird uf die grüeni Dinte zrügggfüert, wo wääred de Verhandlige vom Waffestillstand brucht worde isch, zum d Gränze uf dr Landcharte iizzäichne.
Gschicht
Bis zum Säggsdaagchrieg 1967 si dr Gaaasträife vo Egüpte und s Westjordanland mit em Ostdäil vo Jerusalem vo Jordanie völkerrächtswidrig bsetzt gsi. Sit dr Eroberig vo de Golanhööchene noch em Säggsdaagchrieg si die vo Israel bsetzt. D Sinai-Halbinsle isch 1979 noch em Abschluss vom Friidensverdraag an Egüpte zrugggegee worde. S israelische Jerusalemgsetz vo 1980 impliziert d Iiornig vom Ostdäil vo Jerusalem in d Hauptstadt vo Israel dur Annexion. Im Westjordanland het s jordanische Rächt bis zum Oslo-Friidensbrozäss gulte. 2005 het sich Israel ganz us em Gasasträife zruggzooge und alli israelische Siidlige dört si abbaut worde.
Friidensverhandlige
In de Friidensverhandlige zwüsche Israel und de Palestinenser spiilt d Waffestillstandslinie vo 1949 as sogenannti Gränze vo 1967[2][3] e wichdigi Rolle, wil si vo dr palestinensische Site as Grundlaag für e zuekümftigi Gränze zwüschen em Staat Palästina und em Staat Israel aagluegt wird. Israel het aabote, uf mee as 90 % vom Westjordanland[4] und uf 100 % vom Gasasträife und mit eme israelische Landusgliich e palestinensische Staat z gründe, isch vom Jassir Arafat[5] und Mahmud Abbas[6] abgleent worde.