Mailand–Turin

Mailand–Turin isch s eltscht Eidagesränne im Radsport, wu s hite no git. S Ränne, wu vu Mailand uf Turin fiert, het s erscht Mol anne 1876 stattgfunde un isch dodermit no elter wie di franzesische Klassiker Paris–Brest–Paris un Bordeaux–Paris (beedi 1891 zem erschte Mol). S isch aber erscht 1894 zem zweite Mol durgfiert wore un wird erscht syter anne 1911 regelmäßig uusdrait.

Mailand–Turin, it. Milano–Torino
Mailand–Turin 2007
Uusdragigsland	Italien Italie
Uusdragigszytruum	Oktober
Ränntyp	Eidagesränne
Organisator	RCS
Erschti Uflag	1876
Erschte Siiger	Flagge von Italy (1861-1946) Paolo Magretti
Rekordsiiger	Flagge von Italy (1861-1946) Costante Girardengo (5 Siig)

Mailand–Turin wird vu RCS MediaGroup veraastaltet, wu au dr Giro d’Italia organisiert un Gazzetta dello Sport uusegit.

Bis hite giltet Mailand–Turin as ein vu dr wichtigschte italienische Radklassiker un isch vum Radsportwältverband UCI as "1.HC", dr hegschte Kategori unter dr ProTour, yygstapflet. 2005 un 2006 het Mailand–Turin wider am draditionälle Termin im März stattgfunde un as erschts italienischs Eidagesränne im Friejohr fungiert. Vu 1987 bis 2004 isch dr Ränntermin an s Änd vu dr Radsportsaison (Mitti Oktober) verleit gsi. No zwei Johr Unterbrächig findet s 2010 wider im Oktober statt.

As wichtigschte Aastiig vum rund 200 km lange Ränne giltet dr rund 600 Meter hoch Bärg Superga vor dr Dor vu Turin. S relativ eifach Profil macht s Ränne zue eim vu dr schnällschte Klassiker im Radsport: 1999 het dr Markus Zberg gwunne mit ere Durschnittsgschwindigkeit vu 45,75 km/h.

D Siigerlischt vu Mailand–Turin isch dytli bregt vu italienische Fahrer. Bis hite het s nume 18 uusländischi Siig, di groß Mehrzahl dodervu in dr jingere Zyt. Rekordhalter vum Ränne isch dr Costante Girardengo mit fimf Erfolg zwische 1914 un 1923. As einzige Dytsche het dr Rolf Gölz 1988 un 1989 gwunne. Schwyzer Siiger sin dr Oscar Egg (1914), dr Ferdy Kübler (1956), dr Niki Aebersold (1998) un dr Markus Zberg (1999) gsi.