Maria Popescu

D Mari(oar)a Popescu (* 4. Sebdämber 1919 z Bukarest; † 3. Novämber 2004 im Kanton Wallis) isch Opfer vom ne Schwiizer Juschdizskandaal worde.

D Popescu isch 1945 z Gämf verhafded u wäg Gifdmord a irer Schwigermueter Lelia Popescu (gschdorbe n am 26. Juni 1945) u irem Zimmermeitli Lina Mory (gschdorbe n am 25. Juli 1945) u wäg Gifdmordversuech a irem Schwigervatter Stelian Popescu (wo en eehemalige Juschdizminischder vom rumänische König Karl II. gsii isch) aaklagd worde. Dr Grichdsmediziner François Naville hegi as „zerschdröite Brofässer“^[1] wäsendlech zu irer Aachlag biidréit. Nach emne Brozäss, wo für Schwiizer Verhältniss schbektakulär gsi isch und wo dr Popescu iri Schuld ned éidüütig hed chönne bewise wärde, isch si zu re läbeslängleche Gfängnisschdraaf verurdeilt worde. D Aachlaag hed dr Gämfer Generalschdaatsanwalt Charles Cornu verdrätte. D Popescu hed nie gschdande.^[2]

D Popescu hed d Ziit im Gfängnis Saint-Antoine z Gämf, im Frouegfängnis Hindelbank u i zwone wiitere n Aaschdalte verbrachd. 1950 u 1953 hed si Revisioone vom Verfare erréichd, isch aber abgwise worde. 1957 isch si uf Dränge vom Yves Maître, emne schbétere Gägner vom Pierre Jaccoud, düre Gämfer Gross Rat begnadiged worde. Ir Iiléitig zu irer Outobiografii hed dr Verleger Paul Haupt gschribe: d Popescu hed di „nackdi … brutali Würklechkéit […] vo üsne gordnete Verhältniss vo schwiizerischer Rächdschaffehéit erläbt. En Éinzufall? Gwüss“.^[3]

Es hischdoorischs Brojäkd vor Uni Basu hed sech drmit beschäfdigd, weli Vorschdellige über di „delinkwänti Frou“ ir Vergangehéit „verbréited gsii si u wi d Erwartige a n e ‚normaali Wiblechkéit‘ uusgseh hei“:

„D Popescu, wo nach éigene Wort ofd as «bsungers verwärflechi u gfährlechi Frou» bordretiert worde n isch, isch ke Einzufall. De Bortretierige vo delinkwäte Froue lege meischdens di Verflächdige offe vo de Vorschdellige vo wiblecher Subjekdivität u vo normalisierende Feschdschriibigsbraktike.“^[4]