Mittelmeer-Rundfahrt

D Mittelmeer-Rundfahrt (Tour méditeranéen, syt 2016 La Méditerranéenne) isch e franzesisch Etapperänne gsii. S het zue dr UCI Europe Tour in dr Kategori 2.1 ghert. Des Radränne, wu syter anne 1974 uusdrait woren isch, het draditionäll im Februar stattgfunde un isch vu vile bekannte Radprofi gärn as Yystig in d Saison brucht wore. Vu 1974 bis 1977 isch s unter em Name Trophée Méditerranéen veraastaltet wore. Dr Hauptinitiator un Sportlige Laiter vum Ränne isch dr ehmolig Tour de France-Siger Lucien Aimar gsii. S Ränne isch us fimf bis acht Etappe bstande, d Start- un Zilort sin in dr franzesische Mittelmeerregion gläge, in mänke Johr mit Abstächer an di italienisch Riviera. E Hegschtpunkt vum Ränne het fasch all Johr dr Aastig zum Mont Faron bi Toulon bote, wu vilmol as Zytfahre stattgfunde het.

La Méditerranéenne
Uusdragigsland	Frankreich Frankriich
Uusdragigszytruum	Februar
Ränntyp	Etapperänne
Erschti Uflag	1974
Letschti Uflag	2016
Erschte Siiger	Flagge Frankreichs Charly Rouxel
Rekordsiiger	3 Siig Flagge der Niederlanden Gerrie Knetemann

Dytschi Siger sin dr Rolf Gölz (1992), dr Jörg Jaksche (2004) un dr Jens Voigt (2005) gsi. Schwyzer Siger sin dr Tony Rominger (1989) un dr Stefan Mutter (1981) gsi. Rekordsiger isch dr Niderländer Gerrie Knetemann mit insgsamt drei Siig.

Anne 2015 isch s Ränne wäg eme Finanzstryt abgsait wore. Unter em neie Name La Méditerranéenne isch s Ränne 2016 as Dreiländerfahrt mit Etappe z Spanie, z Frankrych un z Italie durgfiert wore. Syt 2017 isch s nimi uusdrait wore.