Rita Czech-Blasel

Im Winter 1953/54 isch em Tschechoslowaak Hans Czech, wu vor em kummenistische Sischteem in Weschte gfilchtet isch, d Rita Blasel bi me gmainsaame Schyyuusfluug wäg ire Kondizioon ufgfalle. Dr Hans Czech isch ire Trainer woore un speeter hän si ghyroote. Bi irem eerschte Wettkampf im Winter 1954/55 z St. Märge het d Czech-Blasel kai Langlaufschyy ghaa, si het mit ere Chraissäägi iri Alpiine Schyy uf d Braiti vu Langlaufschyy gsägt. Si isch derno uf dr erscht Blatz chuu. D Czech het s Zyyl ghaa, si zue dr Olympische Winterspiil 1960 z fiere. Wäg si eso eergyzig gsii isch, het d Rita Czech-Blasel aber scho bi dr Olympische Spiil 1956 z Cortina d’Ampezzo chenne mitmache.E baar Wuche speeter het si di dytsch Maischterschaft z Willingen gwunne un au indr zwelf Joor druf het d Fryburgeri ire Titel chenne verdaigdige .

Bi dr Olympische Spiil z Squaw Valley 1960 isch si iber 10 Kilemeeter uf dr zwelft Rang chuu. D Chreenig vum Joor isch e zweete Blatz am Holmenkollen z Norwääge gsii. Au vier Joor speeter isch si bi dr Olympische Winterspiil z Innschbruck 1964 aadrätte, mit dr Stapfle het si d Bronzemedallie grad eso verbasst.

No ire Sportkarrieere het si ne Uusbildig zur Spoortleereri gmacht un isch in Schueldienscht gange. Si isch aber als bi Schyywettbewäärb aadrätte, si het unter anderem 1969 di eerscht Uusdraagig vum Engadin Skimarathon gwunne un isch 1967 un 1969 Schwyzer Schyylanglaufmaischteri woore.

Näb ire Aarbet as Spoortleereri isch si ab 1975 fir segs Amtsperioode Stadtreeti im Gmairoot z Fryburg gsii.^[1]

• Rita Czech-Blasel in dr Datebank vu Olympedia.org (änglisch)