Sandhya Hasswani
D Sandhya Hasswani (* 1987 z Bad Säckige) isch e Schurnalischti un Dialäktdichteri us em Hotzewald.
Lääbe
D Hasswani isch z Säckige as Dochter vun ere änglisch-dytsche Mueter un eme indische Vater uf d Wält chuu un z Herrischried uf em Hotzewald ufgwachse. Ab 1998 isch si z Säckige uf s Scheffel-Gimnasium gange un het dert anne 2007 Abitur gmacht. Si het an ere private Färnhochschuel z Darmstadt Literatur un Schurnalismus studiert un isch derno Schurnalischti wore. Si schrybt as freii Mitarbaiteri fir dr Sidkurier un di Badisch Zytig. Si isch ghyrote mit em Harmeet Singh Hasswani-Kooner un het mit ihm zwai Chinder. D Sandhya Hasswani wohnt mit ihre Familie z Herrischried.
D Hasswani schrybt uf Hochdytsch un im Hotzewälder Alemannisch. Glehrt het si s Alemannisch in dr Chinderschuel un dr Grundschuel un vu ire Gotte.
Anne 2013 isch si bim bade-wirttebärgische Literaturwettbewerb „Jugend auf dem Land“ fir ihri Gschicht „4 PS – halbstark unterwegs“ mit ere Ehreurkund uuszaichnet wore.[1]
Anne 2015 het si bim Gerhard-Jung-Wettbewärb mitgmacht un het dert e zweete Bryys in dr Kategory „Lyrik“ gwunne.[2][3] Drei Johr speter het si wider mitmacht un mit ihre Szene „Heb Sorg uff dini Sproch“ in dr Kategory „Spiil“ dr 1. Bryys gwunne.[4][5]
Fir dr Hotzewaldkaländer 2018 het d Sandhya Hasswani zwelf Verzellige gschribe mit gschichtlige Eraignis, Sage un Legände us dr Region, illuschtriert vum Markus Olivieri un dr Kristine Gelderbloom. Si het do hischtorischi Sage nooverzellt.[6] Au dr Dodtmiser Jubiläumskaländer hän die drei gstaltet, mit Verzellige vu dr Hasswani un Bilder vum Olivieri un dr Gelderbloom.[7][8] Anne 2020 isch unter em Titel Sagenhafter Hotzenwald im Basler Friedrich Reinhardt-Verlag e Buech mit 32 nooverzellte Sage us em Hotzewald uusechuu.
Zäme mit em Verain Aktiver Hotzenwald het d Hasswani 2016 en Alemannisch-Wettbewärb fir Schuele us em Hotzewald in s Lääbe gruefe, wu all baar Johr soll stattfinde.[9] 2019 isch er zum zwaite Mol duregfiert wore.[10]
Anne 2021 het si im Drey-Verlag im Buech Chind un andri Ploge wo glücklich mache 51 Gschichte uf Alemannisch publiziert. Im nämlige Johr het si bim Dialäktwettbewärb Lohrer Murre mit dr Gschicht „Do aacho“ e zweete Bryys in dr Kategory Prosa gwunne.[11]
Im Johr 2022 het si dr historisch Roman Die letzte Äbtissin iber di letscht Firschtäbtissi vum Frauestift Säckinge, d Marianna von Hornstein-Göffingen, publiziert.
D Hasswani isch Mitglid bi dr Muettersproch-Gsellschaft un dert syter 2020 Mitglid im Vorstand as Bysitzeri.
Wäärch
- Sagenhafter Hotzenwald. Friedrich Reinhardt Verlag, Basel 2020. 320 S.
- Chind un andri Ploge wo glücklich mache. Drey-Verlag, Gutach 2021. ISBN 978-3-948482-05-3
- Die letzte Äbtissin. Friedrich Reinhardt, Basel 2022. ISBN 978-3-7245-2574-5. 544 S.
Weblink
- Websyte vu dr Sandhya Hasswani
- Täxtprobe uf dr Websyte vu dr Muettersproch-Gsellschaft
- Künstlerinnen & Künstler uf dr Websyte vum Projäkt „Mundart in der Schule“
- Karin Stöckl-Steinebrunner: Mundart-Autorin spürt dem Herrischrieder Stehli-Fürscht nach, Badische Zeitung, 31. Mai 2019
- Die Gotte war Patin für die Mundart, Badische Zeitung, 10. Mai 2022
- Sandhya Hasswani schreibt über die letzte Äbtissin – und verrät, was wir von ihr lernen können, Südkurier, 26. Oktober 2022