Charles Bickford

Bickford nació en Cambridge (Massachusetts), nel primer minutu de 1891^[3]. Quintu d'ente siete hermanos, Charles foi un mozu intelixente, pero bien independiente ya indisciplináu. Cuando tenía nueve años foi xulgáu y absueltu pol intentu d'asesinatu d'un motorista que por fuercia pillara al so perru. Mentanto la so adolescencia viaxó al debalu pelos Estaos Xuníos, magar que darréu llegó a graduase nel Institutu Teunolóxicu de Massachusetts.

Enantes d'empezar a actuar, trabayó como lleñador, promotor d'inversiones, y mientres un curtiu periodu dirixó un negociu d'estermín de pestes. Finalmente xunióse a una compañía de teatru cola que viaxó pelos Estaos Xuníos mientres más d'una década, interviniendo cola mesma en delles producciones. Mientres una representación nuna obra de Broadway llamada "Outside Looking In," foi afayáu pol llexendariu direutor Cecil B. DeMille, que-y ufiertó un contratu colos estudios Metro-Goldwyn-Mayer. Llueu empezó a trabayar con MGM en numberosos proyeutos.

Convirtióse nuna estrella n'interpretando al amigu de Greta Garbo en Anna Christie (1930), pero enxamás aportó a intérprete de grandes papeles románticos. Siempres con mentalidá independiente, de calter fuerte y rápidu colos puños, Bickford aldericaba con frecuencia y dacuando llegaba a les manes con Mayer. Mientres el rodaxe de la película de DeMille Dynamite, pegó al so direutor, polo que finalmente atopóse na llista negra de la MGM. Comprensiblemente, la so asociación con MGM duró pocu, y Bickford foi un actor independiente mientres dellos años. Darréu robló colos estudios 20th Century Fox, au garantizóse-y qu'interpretaría papeles principales. Sicasí, Bickford resultó mancáu por un lleón mentanto rodaba East of Java en 1935. Magar que recuperóse del ataque, perdió'l so contratu cola Fox, según la so status de protagonista, por cuenta de los estensos repulgos que-y quedaron como secuela, asinca como pola so yá avanzada edá.

Sumiendo la posibilidá de faer papeles protagonistes, Bickford buscó papeles d'actor de calter. Equí atopó los sos mayores ésitos, tantu nel cine como más tarde na televisión. La so constitución robusta, les sos faiciones marcaes, empareyaes cola so aspra pero poderosa voz, lleváronlu a ser escoyíu nuna gran variedá de papeles en producciones d'alta calidá. De cutiu interpretaba papeles de padres queríos, decidíos homes de negociu, matones, capitanes de barcu o figures autoritaries de diversu tipu. A lo llargo de los años cuarenta foi nomáu en trés vegaes al Óscar al meyor actor de repartu.

Nos sos últimos años, Bickford interpretó al rancheru John Grainger, propietariu del "Ranchu Shiloh" na serie de la NBC The Virginian. Finó en Los Angeles por causa de una infeición sanguínea, a los 76 años d'edá. Casárase en 1919 con Beatrice Loring. Tuvo un fíu, Rex, y una fía, Doris.

• Dynamite (Dinamita) (1929)
• Pride of the Marines (1936)
• High, Wide, and Handsome (1937)
• Of Mice and Men (1939)
• Queen Of The Yukon (1940)
• Reap the Wild Wind (1942)
• The Song of Bernadette (1943)
• Mr. Lucky (Mister Lucky) (1943)
• Wing and a Prayer (1944)
• Duel in the Sun (1946)
• The Farmer's Daughter (1947)
• Johnny Belinda (1948)
• Whirlpool (1949)
• Jim Thorpe, All American (1951)
• A Star Is Born (1954) xunto a Judy Garland y James Mason
• The Court-Martial of Billy Mitchell (1955)
• Not as a Stranger (1955)
• The Big Country (1958)
• The Unforgiven (The Unforgiven) (1960)
• Days of Wine and Roses (1962)
• A Big Hand for the Little Lady (1966)

Traducíu direutamente d'English Wikipedia

• Wikimedia Commons acueye conteníu multimedia sobre Charles Bickford .
• Charles Bickford na Internet Movie Database (n'inglés)
• «Charles Bickford». en Find a Grave. (n'inglés)