Maiklos Džeksuons
Michael Joseph Jackson (Maiklos Džuozeps Džeksuons, g. 1958 m. rogpjūtė 29 d. - mėrė 2009 m. bėrželė 25 d.) – JAV dainėninks, dainiu autuorios, šuokies ė pruodioseris. Vadėnts pop mozėkas karaliom. Anuo siekmėnga karjiera ė asmenėnis gīvenėms aple 40 metu bova puopolēriuosės koltūras dalės.
Itaka
Terp Maikla Džeksuona pasėikėmu mozėkas indostrėjuo īr revuoliocėnga mozėkėniu klėpu transfuormacėjė, aukšta līgė albomu leidība ė anū pardavėms, kāp naus būds irašu kuompanėjėms gautė pėnėngū, līderiavėms popmozėkas svietė 1980-āsēs bei tapėms pėrmo joudauodio dainėninko, katros ėš kūrībėnės nažėnuomībės ėšvedė jauna MTV kanala. Atlėkiejė ėšsėskėrontis stėlios, jodesē ė vuokals ikviepė, padėrba itaka ė pagėmdė vėsa hip – hop, pop ė R&B mozėkas žonru daininėnku karta (Mariah Carey, Usher, Britney Spears, Justin Timberlake, Omarion, Ne-Yo, Chris Brown ė t.t.). Ginesa rekuordu kninguo Maikls Džeksuons ivardėnts kap „Patsā siekmėngiausis vėsū čiesu pramuogu svieta atstuovs“.
Ba mozėkėnės veikluos, daininėnks da žėnuoms diel chuoreuograpėjuo nauduojamu sodietėngu fizėniu teknėku (robuots aba mienolė ēsena), katras padėrba itaka vīraujantiuos maduos šuokems bei pramoguoms.
Apdovėnuojėmā
Maiklos Džeksuons ėš vėsa pelnė 18 Grammy apdovėnuojėmu (vėin par 1984 m. apdovėnuojėmu ceremuonėjuo ans pelnė 8, kas īr da vėins rekuords), JAV ėšleida 13 „nomeris vėins“ singlu. 2006 World Music Awards paskelbė, ka vėsam svietė Džeksuons ėš vėsa pardavė daugiau kāp 750 000 000 kuopėju irašu ė labdarā atėdavė 300 mėlėjuonu JAV duolėriu.
Maiklos Džeksuons īr daugiausē irašu svietė pardavės dainėninks ė vėins daugiausē labdarā aukuojosiu prieteliu, katruo pastangas bova ivertėntas Nuobelė taikuos premėjės nuomėnacėjė.
Glavnėjė apduovenuojėmā:
| Apduovėnuojėmā | Anū skaitlios |
|---|---|
| Amerėkas mozėkas apduovėnuojėmā | 22 |
| Billboard apduovėnuojėmā | 40 |
| Brit mozėkas apduovėnuojėmā | 7 |
| Auksėnė gaublė apduovėnuojėmā | 1 |
| Grammy apduovėnuojėmā | 18 |
| Svieta Ginesa rekuordā | 13 |
| MTV mozėkas apduovėnuojėmā | 13 |
| NAACP ivaizdė apduovėnuojėmā | 14 |
| RIAA apduovėnuojėmā | 56 |
| Svieta mozėkas apduovėnuojėmā | 12 |
| Ėš vėsa: | 197 |
Škandalā
Nu 1988 lėgė 2005 m. Maikls Džeksuons gīvena sava rančuo Neverland, kor ans bova ikūrės pasėlėnksminėmu parka ė privatu zooluogėjės suoda. Džeksuona rančuo tonkē lonkės vākā so negalė bei sergontīs smertėnuom lėguom. Džeksuons bova apkaltėnts seksoalėnio prikabiavėmo pri vākū ė bova teisams, ale teisms dainėninka ėšteisėna.
Džeksuonou bova atlėkta daug plastėniu uoperacėju, palėka pakeista skūras spalva ėš jouduos i balta.
Smertės
2009 m. bėrželė 25 d. rīta, Maiklos Džeksuons prarada sāmuonė sava namūsė Los Andželė. Atvīkos medėkams, Džeksuons nebkviepava, ans bova skobē reanėmouts[1] [2]. Džeksuons patīrė kuoma ė pasėmėrė nespiejos anuo nugabentė i lėguonėnė. Skruodėms paruodė, ka dainėninks apsitručėjė anestetikās.[3] Diutuo i kaliejėma ož žmuogžodīstė natīčiuom ketoriem metam pasuodėnts Maikla Džeksuona gīdītuos Konrads Muriejos.
Dėskuograpėjė
M. Džeksuons nu 1972 lėgė 2001 m. ėšleida 10 stodėjėniu albomu.
- Got to Be There (1972)
- Ben (1972)
- Music and Me (1973)
- Forever, Michael (1975)
- Off the Wall (1979)
- Thriller (1982)
- Bad (1987)
- Dangerous (1991)
- HIStory (1995)
- Invincible (2001)
1982 m. anuo ėšleists alboms Thriller lėgė šiuolē īr nuogniausē perkams alboms svietė. Lėgė 2009 m. bova pardouta aple 109 mėlėjuonā anuo kuopėju.[4]
Fėlmuograpėjė
- The Wiz (1978)
- Maikla Džeksuona Thriller (1983)
- Captain EO (1986)
- Moonwalker (1988)
- Maikla Džeksuona Ghosts (1997)
- Men in Black II (2002)
- Miss Cast Away and the Island Girls (2004)
- Maikla Džeksuona This Is It (2009)
- Bad 25 (2012)
- Maikal Džeksuona Journey from Motown to Off the Wall (2016)
- Thriller 40 (2023)
