Estalagmita

Unha estalagmita (do grego σταλαγμίτης stalagmítēs, de σταλαγμίας stalagmías, "gota")^[1] é un tipo de espeleotema (depósito de minerais que se forman por precipitación química) que se forma no solo dunha cova nunha zona calcaria debido á decantación de solucións e a deposición de carbonato cálcico. A formación correspondente no teito da cova coñécese como estalactita. Se ambas as formacións, enfrontadas, crecen o suficiente como para encontrarse, o resultado denomínase columna ou piar.

A formación de estalagmitas ocorre só baixo certas condicións de pH no interior da caverna.^[2]

A estalagmita máis alta do mundo encóntrase na cova de Zhin Jin, China, e ten 70 m de altura.^[3]