Manuel Sánchez Salorio
Manuel Sánchez Salorio, nado na Coruña o 22 de xaneiro de 1930 e finado na mesma cidade o 16 de marzo de 2023, foi un médico oftalmólogo e humanista galego que configurou unha escola científica española coñecida actualmente como Escola Galega de Oftalmoloxía.[1][2][3] Foi académico numerario da Real Academia de Medicina e Cirurxía de Galicia e foi o creador da primeira Rede de Investigación Colaborativa en Oftalmoloxía (Oftared).[4]
| Biografía | |
|---|---|
| Nacemento | 22 de xaneiro de 1930  A Coruña, España |
| Morte | 16 de marzo de 2023 (93 anos) A Coruña, España |
| Datos persoais | |
| País de nacionalidade | España |
| Educación | Universidade de Santiago de Compostela |
| Tese académica | 'La regulación nerviosa de la tensión ocular (1955) |
| Actividade | |
| Ocupación | oftalmólogo |
| Lingua | Lingua castelá |
Premios
| |
 | |
Traxectoria
Fillo do oculista Manuel Sánchez Mosquera[1] e sobriño de Juan José Barcia Goyanes,[5] percibiu precozmente o seu ambiente familiar: a cátedra universitaria.[6] Un irmán da súa nai foi Demetrio Salorio Suárez, alcalde da Coruña.[1]
Licenciouse en Medicina pola Universidade de Santiago de Compostela (1946-52), con Premios Extraordinario e Nacional Fin de Carreira, e doutorouse pola mesma Universidade, con Premio Extraordinario cunha tese titulada La regulación nerviosa de la tensión ocular ("A regulación nerviosa da tensión ocular", 1955). Realizou a especialidade de oftalmoloxía primeiro co seu pai e logo co profesor Ángel Moreu González-Pola, catedrático de oftalmoloxía de Santiago de Compostela. Este nomeouno o seu profesor adxunto (1956-63), devindo logo á súa morte encargado de cátedra e finalmente catedrático desa disciplina en 1963, sendo o primeiro catedrático de Oftalmoloxía da universidade compostelá. Aprendeu cirurxía ocular asistindo aos servizos de Hermenegildo Arruga, Ignacio Barraquer e Ramón Castroviejo.
Fiel expoñente da universidade autárquica creou a escola científica inicialmente coñecida como Escola Profesional de Oftalmoloxía e que adoita chamarse hoxe Escola Galega de Oftalmoloxía anexa a devandita Cátedra. Foi ademais Vicedecano da Facultade de Medicina e Vicerreitor de Extensión Universitaria da Universidade de Santiago de Compostela (1975).
O 27 de febreiro de 1981 ingresou como Académico Numerario na Real Academia de Medicina e Cirurxía de Galicia.[7]
Un dos membros máis antigos do corpo médico da comunidade galega e remiso á xubilación, en 2015 continuaba a ser o director da Fundación Instituto de Oftalmoloxía de Galicia (Ingo).[2]
Escribiu numerosos artigos para a Revista Española de Oftalmología e outras publicacións da especialidade. A súa escola fixo importantes achegas científicas sobre a circulación da retina e, moi especialmente, ofreceu unha solución ao tratamento da enfermidade ocular chamada glaucoma, frecuente en Galicia.[8]
Outras actividades
Sánchez Salorio foi un dos fundadores en 1961 do Real Club de Golf da Coruña.[9]
Recoñecementos
- Medalla Castelao (1996).[10]
- Medalla de Ouro do Colexio Oficial de Médicos da Coruña (2010).[11]
- Medalla de Galicia (2015).[12]
Notas
Véxase tamén
Bibliografía
- Barrera, Feliciano, ed. (2002). "Sánchez Salorio, Manuel". Gallegos. Quién es quien en la Galicia del siglo XXI (en castelán). Santiago de Compostela: El Correo Gallego. p. 532. ISBN 84-8064-113-4.
Ligazóns externas
- Álvarez, E.: Manuel Sánchez Salorio: «El médico tiene que meterse dentro de la piel del paciente» La Voz de Galicia, 14/9/2012.
- Lugilde, A.: Manuel Sánchez Salorio, 82 años: "Continúo activo para seguir vivo" La Vanguardia, 31/12/2012.