Ալեքսանդրա Պիվովարովա
Ալեքսանդրա Իգորևնա Պիվովարովա (ռուս.՝ Александра Игоревна Пивоварова, առավել հայտնի է որպես Սաշա Պիվովարովա (ռուս.՝ Саша Пивоварова, հունվարի 21, 1985, Մոսկվա, ԽՍՀՄ), ռուս սուպերմոդել, աշխարհի ամենահայտնի ու ամենապահանջված մոդելներից մեկը[1]։ Հայտնի է որպես միակ մոդելը, որ վեց սեզոն անընդմեջ մասնակցել է Պրադայի գովազդային ընկերությանը։ Սաշա Պիվովարովային կոչում են «մոդել-այլմոլորակային», քանի որ նա ունի ոչ ստանդարտ դեմք. նա ունի եռանկյունաձև դեմք, նշաձև աչքեր, լայն ճակատ ու դուրս ցցված այտոսկրեր։
| Ալեքսանդրա Պիվովարովա ռուս.՝ Александра Пивоварова | |
|---|---|
 | |
| Ծնվել է | հունվարի 21, 1985 (39 տարեկան) |
| Ծննդավայր | Մոսկվա, ԽՍՀՄ |
| Քաղաքացիություն |  Ռուսաստան |
| Մայրենի լեզու | ռուսերեն |
| Մասնագիտություն | Սուպերմոդել և մոդել |
 Sasha Pivovarova Վիքիպահեստում | |
Կենսագրություն
Ալեքսանդրա Պիվովարովան ծնվել է 1985 թվականի հունվարի 21-ին Մոսկվայում։ Մանկուց երազել է զբաղվել նկարչությամբ, և ծնողները սատարել են նրան այդ հարցում։ Մոր հետ նա այցելել է մայրաքաղաքի թանգարաններն ու ցուցահանդեսները, իսկ դպրոցն ավարտելուց հետո ընդունվել է Ռուսաստանի հումանիտար գիտությունների պետական համալսարանի արվեստի պատմության ֆակուլտետ։ Այստեղ նա ծանոթացել է լուսանկարիչ Իգոր Վիշնյակովի հետ, ում հետ ամուսնացել է։
Ալեքսանդրա Պիվովարովան չի երազել մոդել դառնալու մասին։ Իգոր Վիշնյակովը լուսանկարել է նրան 2005 թվականին և լուսանկարներն ուղարկել IMG միջազգային մոդելային գործակալություն՝ դրանով իսկ սկիզբ դնելով Պիվովարովայի մոդելային կարիերային։ Իգոր Վիշնյակովն Ալեքսանդրա Պիվովարովայի լուսանկարն ուղարկել է IMG-ի նյույորքյան գրասենյակ, իսկ երկու շաբաթ անց Սաշա Պիվովարովան արդեն մասնակցել է Prada-ի շոուին Միլանում։
Թեև Սաշա Պիվովարովան ստիպված է եղել թողնել ինստիտուտը, սակայն նա շարունակում է նկարել։ Նա շատ է ճանապարհորդում, այցելում է աշխարհի տարբեր թանգարաններ ու նկարչական ստուդիաներ։ Նա նկարում է թղթի, անձեռոցիկների, թղթի կտորների վրա, նոթատետրերում՝ օգտագործելով մատիտներ, ածուխ և նույնիսկ սուրճ կամ գինի։
Սաշա Պիվովարովան բուսակեր է և չի օգտագործում ալկոհոլային խմիչքներ[2]։ Իր գեղեցկության գաղտնիքը նա համարում է ալկոհոլից հրաժարումն ու շպարի չափավոր օգտագործումը։
2011 թվականին Սաշա Պիվովարովան GAP ընկերության համար ստեղծել է գիշերազգեստների շարք, որոնց վրա պատկերված են իր նկարները[3]։
Ամերիկյան Models.com կայքում ներկայացված համաշխարհային ճանաչում ունեցող թոփ-մոդելների վարկանշային ցանկում Սաշա Պիվովարովան նշված է «Industry Icons» բաժնում, որտեղ ընդգրկված է նաև Նատալյա Վոդյանովան[4]։
Ընտանիք
Ալեքսանդրա Պիվովարովան ամուսնացած է լուսանկարիչ Իգոր Վիշնյակովի հետ[5]։ 2012 թվականի մայիսին Նյու Յորքում ծնվել է նրանց դուստրը, ում կոչել են Միա Այսիս։
Գովազդային ընկերություններ
Սաշա Պիվովարովան նկարահանվել է Prada-ի գովազդում։ Մի քանի սեզոն նա եղել է Giorgio Armani, Olay և Tiffany ընկերությունների դեմքը։ Մասնակցել է Gucci, Chanel, Alexander McQueen, Christian Dior, Calvin Klein, Donna Karan, Louis Vuitton, Marc Jacobs, Ralph Lauren, Chloe, Valentino, Givenchy, Jean-Paul Gaultier, Miu Miu, Hermès, Kenzo, Viktor & Rolf, Dolce&Gabbana, Balenciaga, Zac Pozen, Fendi և Yohji Yamamoto նորաձևության տների ցուցադրություններին։ Երկու տարի Սաշա Պիվովարովան լուսանկարվել է Vogue ամսագրի ռուսական, բրիտանական, ավստրալիական, իտալական, ֆրանսիական ու ճապոնական տարբերակների շապիկի համար[6]։ 2008 թվականին Սաշա Պիվովարովան դարձել է Pirelli-ի «Արևելքի մարգարիտներ» օրացույցի սեպտեմբերի դեմքը։ Ալեքսանդրա Պիվովարովան նաև եղել է 2011-2012 Reserved աշուն-ձմեռ հավաքածուի դեմքը[7]։
Ֆիլմագրություն
| Տարի | Հայերեն անվանում | Բնօրինակ անվանում | Դեր | |
|---|---|---|---|---|
| 2011 | ֆ | Ժամանակ | In Time | Կլարա, Ֆիլիպ Ուայսի զոքանչը |
| 2015 | ֆ | Կողոպուտ | The Heist | մոդել |
Ծանոթագրություններ
Արտաքին հղումներ
- «Sasha Pivovarova: FMD» (անգլերեն). Արխիվացված օրիգինալից 2012 թ․ փետրվարի 21-ին. Վերցված է 2010 թ․ հունվարի 23-ին.
- «Sasha Pivovarova: supermodels.nl» (անգլերեն). Արխիվացված օրիգինալից 2012 թ․ փետրվարի 21-ին. Վերցված է 2010 թ․ հունվարի 23-ին.
- Սաշա Պիվովարովան Style.com կայքում
 | Վիքիպահեստն ունի նյութեր, որոնք վերաբերում են «Ալեքսանդրա Պիվովարովա» հոդվածին։ |