Ակսել Բակունցի տուն-թանգարան

Տուն-թանգարանի հանդիսավոր բացումը տեղի է ունեցել 1970 թվականի սեպտեմբերի 17-ին։ Մինչ այդ տան կեսը վաճառված է եղել։ 1970 թվականին Բակունցի 90-ամյակի կապակցությամբ տունը ետ է գնվել։ Տուն-թանգարանի ստեղծման և զարգացման մեջ մեծ ներդրում է ունեցել թանգարանի տնօրեն Քաջիկ Միքայելյանը։ 2011 թվականին կատարվել է թանգարանի հիմնանորոգում. փոխվել է տանիքը, ներքին հարդարման աշխատանքներ են կատարվել։ Զգալի աշխատանքներ են իրականացվել նաև բակում։ 2012 թվականին ավելի շատ աշխատանքներ են կատարվել դրսի հարդարման վրա. տեղադրվել է բազրիք, թանգարանը լուսավորվել է փողոցի կողմից։

Թանգարանն ունի շուրջ 500 ցուցանմուշ, այդ թվում լուսանկարներ, իրեր, առկա են նաև հազարավոր գիտաօժանդակ նյութեր։ Դրանք ներկայացնում են գրողի ուսումնառության տարիները, զինվորական կյանքը, գրական բեղմնավոր գործունեությունը։ Այստեղ է պահվում նաև հարուստ գրադարանը։

Տուն-թանգարանում կազմակերպվում են Բակունցի ստեղծագործությանը, արդի գրական խնդիրներին վերաբերող տարաբեր միջոցառումներ, ամենամյա բակունցյան օրեր։

Թանգարանը գտնվում է Սյունիքի մարզի Գորիս քաղաքում, Մաշտոցի փողոցի 41 հասցեում։

• Բակունցի տունը
• Միջոցառումներ Ակսել Բակունցի տուն-թանգարանում

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 2, էջ 246)։