Ռադա Միթչել

Ռադան ծնվել է Մելբուռնում և եղել է վաղ ամուսնալուծված ծնողների միակ երեխան։ Դաստիարակվել է հինդուիստական մշակույթի և կրոնի ոգով։ Հայրը ռեժիսոր է, իսկ մայրը՝ դիզայներ^[4]։ Ավարատել է Ավստրալիայի Սուրբ Միքայելի գիմնազիան։ Նրա առաջին անունը Ռադա (անգլ.՝ Radha) է, ունի սանսկիրտերեն ծագում։ Հինդուիզմում այդպես էին անվանում Կրիշնա աստծո սիրեցյալին։ Ռադան բուսակեր է և զբաղվում է յոգայով։

Միթչելը իր կարիերան սկսել է ավստրալիական հեռուստատեսությունում՝ մանկական հեռուստասերիալում։ 1994 թվականին «Հարևանները» սերիալում խաղացել է երկու բոլորովին տարբեր դեր։ Այդ շոուին նա մասնակցել է 3 տարի։

1997 թվականին երկու ֆիլմերում՝ «Բարձր արվեստ» և «Բոլորը միասին» մասնակցելու համար պարգևատրվել է «Անկախ ոգի» կինոմրցանակով։ Նրա մյուս ֆիլմերի թվում են՝ «Սև խոռոչ»՝ Վին Դիզելի, «Հեռախոսախցիկ»՝ Քոլին Ֆարելի և «Ցասում»՝ Դենզել Վաշինգտոնի հետ միասին։

Ռադա Միթչելը նկարահանվել է նաև «Կախարդական երկիր» ֆիլմում, որտեղ գլխավոր դերերում խաղում էին Ջոնի Դեփը և Քեյթ Ուինսլեթը։ Այս ֆիլմի բոլոր աստղերը ստացել են կինոդերասանների գիլդիայի մրցանակ՝ ականավոր դերեր անվանակարգում։ Maxim ամսագրի «Թեժ 100-ը 2002-ին» վարկանիշում^[5] զբաղեցրել է 45-րդ տեղը։

2005 թվականին Միթչելը գլխավոր դեր է խաղացել Վուդի Ալլենի «Մելինդա և Մելինդա» ֆիլմում, «Սիրուց խենթացած» ֆիլմում խաղացել է Իզաբելլայի դերը։ Նաև նկարահանվել է 2006 թվականի ճապոնական պաշտամունքային վիդիոխաղի մոտիվներով համանուն «Սայլնթ Հիլ» սարսափ ֆիլմում։ 2008 թվականին Միթչելը Մայքլ Վարդանի հետ նկարահանվել է «Կոկորդիլոս», «Հենրի Փուլն արդեն այստեղ է», ինչպես նաև՝ «Հուան Շիի երեխաները» ֆիլմերում։

Ռադա Միթչելի մասնակցությամբ վերջին ֆիլմերն են՝ 2009 թվականի ֆանտաստիկ «Սուռոգատներ» մարտաֆիլմը, որի ռեժիսորը Ջոնաթան Մոստոուն էր, իսկ գլխավոր դերում խաղում էր Բրյուս Ուիլիսը և 2008 թվականի՝ ռեժիսոր Միմի Լեդերայի «Գողի օրենսգիրքը» քրեական ֆիլմը։ Ռադան հայտնվել է նաև «Սայլնթ Հիլ 2» ֆանտաստիկ ֆիլմի երկրորդ մասում։ Միթչելը խաղացել է նաև «Կարմիր այրին» սերիալի գլխավոր դերը։ Սերիալի պրեմիերան տեղի է ունեցել 2013 թվականին ABC հեռուստաալիքով^[6]։