De Anton Schaller (* 11. Oktober 1941 z Nottu; heimetbrechtigt z Altbüron und z Züri) isch e Schwiizer Färnsehjournalist und Bolitiker (LdU), wo hüt als Kommunikationsberater schafft.
De Anton Schaller isch Chefredaktor vo de Tagesschau vom Schwiizer Fernseh gsii und het d Bundeshuusredaktion gleitet. Er isch au Moderator und Leiter vo de Arena, de Rundschau und vom Zischtigsclub gsii.
1995 isch de Anton Schaller in de Zürcher Kantonsrat gwählt worde. 1999 het er s Präsidium vom Landesring vo de Unabhängigen (LdU) ünernah und isch am 20. April als Naafolger vo de Verena Grendelmeier in de Nationalrat gruckt. Bi de Parlamentswahle 1999 isch er aber nöd widergwählt worde. De Landesring het dademit de Nationalratssitz verlore un het sich na im Dezember 1999 ufglöst.
De Anton Schaller isch ghirate und het zwei Chind.