Der Hebel-Wanderwääg isch e Wääg, wo em Aadänke vom Mundartdichter Johann Peter Hebel gwidmet isch. Er goot dur d Landschaft vom Markgräflerland im Südweschte vom Schwarzwald und uf Basel.
Ane 2007 het me bim Hebelbund Lörrach d Idee für dä literarisch Wanderwääg gha, und mit Hilf vo de Gmeinde, wo dr Wääg duregoot, isch s Projäkt bis 2010 z Stand choo. Em Huusemer Bürgermeischter Martin Bühler isch d Leitig vom Projäkt z verdanke. S Gält für zum der Wääg zwäägzmache isch vo de Wiisetaaler Gmeinde, em Verein «Naturpark Südschwarzwald», vom Land Baade-Würtebärg und vo dr EU choo.
Dr Hans-Jürgen Schmidt, wo dozmol dr Presidänt vom Hebelbund gsi isch, het gseit, me chönn uf däm Wäg go luege, was der Hebel i sim schöne und grosse Gedicht «Die Wiese» über die Gägend gschribe het. I dere länge gryymtei Verzellig prichtet dr Hebel vo däm, wo dr Fluss, d Wiise, ufem Wääg vo dr Kwelle am Fäldbärg obe s Wiisetaal z’durabb und bis ganz abe an Rhy alles so erläpt und macht.
Es het em Wanderwääg noo a vilne Oort Dafele, wo eim öpis zum Hebel sim Gedicht vo dr Wiise und vo sim Lääbe und über d Kulturgschicht vo dere Flusslandschaft sääge. Dr Schwarzwaldverein het, wil e Deil vom nöie Hebel-Wääg uf däm sine alte Wanderwääg isch, ghulfe die Dafele ufstelle. Die meischte Tegscht uff de Dafele sind vom Hans-Jürgen Schmidt, em Dominique Wunderlin und vo dr Eva Ehrenfeld.
Commons: Hebel-Wanderweg – Sammlig vo Multimediadateie