Kinda — arab qabilasi, Xadramavtning gʻarbida istiqomat qilgan. Milodiy 5-asr boshida K. himyariy podshohlari yordamida Markaziy Arabiston qabilalarini boʻysundirgan va markazi Yamoma va Bahraynda boʻlib, Himyariylar podshohligiga qaram boʻlgan davlat barpo etgan. K.ning eng mashhur podshohlari — sulola asoschisi Hujr ibn Amr (425—458) va uning nabirasm al-Xo-ris (489—529). Uning davrida K. yerlari Vizantiya va Eron chegaralarigacha yetgan. K. davlati 529 yil laxmiylardan magʻlubiyatga uchrab oʻzaro nizolar natijasida qudrati singan. 6-asr oʻrtasida K. davlati Markaziy Arabistondagi mulklaridan mahrum boʻlgan. K.ning Yamoma va Bahrayndagi hukmronligi 7-asrning 30-yillarigacha saqlangan. K. davlati — Markaziy Arabiston hududida vujudga kelgan ilk davlat birlashmasi boʻlib, u Arab xalifaligining barpo etilishiga zamin tayyorlagan. Johiliyat davrining mashxur shoiri Imrulqays (6-asr) K.dan chiqqan.[1]