南固臺係香港一座古老大屋，嚮香港島灣仔船街55號，堅尼地道以北，近捷船街，係香港一級歷史建築。[1] 南固臺樓高2層，有天棚，佔地200平方米，嚮船街以南最高點，冇車路到，上落有百石級，建築風格揉合中西文化，正面個樣好似1914年起好嘅甘棠第。大屋外牆主要用紅磚砌，係啲人所講嘅紅磚屋。[2]
南固臺嚮船街街尾，自建私家路麻石砌樓級通大門。南固臺唔算係掘頭路，因為有小路通上半山區堅尼地道，即係近嘉諾撒聖方濟各書院小學部東邊。
南固臺有唔少鬼屋原素。大門外面係斜坡同樓級，長年生咗唔少野樹，陰陰沉沉。斜坡上倒滿幾廿年嚟嘅建築廢料，有唔要嘅神主牌同洗手盤。船街路面有沙井，地底係地下水道，沙沙流水聲。嗰度有流浪貓成群出沒，深宵貓叫。
南固臺係1918年由當時富商杜仲文起，之後轉手畀細佬杜澤文。杜澤文係永安百貨副司理，1945年死咗，之後間屋一直冇人理。
2008年，合和實業發展灣仔南面，打做香港地產品牌叫做The East，媲美太古地產嘅品牌Island East。嚮11月胡文新承諾幫手保育活化南固臺。[3]
