Mike Pompeo

US-amerikanesche Politiker a Jourist

De Michael Richard Pompeo, genannt Mike Pompeo, gebuer den 30. Dezember 1963 zu Orange a Kalifornien, ass en US-amerikaneschen Affekot a Politiker, dee vun Abrëll 2018 bis Januar 2021 Ausseminister vun den USA war. Hien ass Member vun der republikanescher Partei a gehéiert do zur konservativer a rietspopulistescher Tea-Party-Beweegung.

Mike Pompeo
Gebuer30. Dezember 1963
Orange
NationalitéitUSA
EducatiounUnited States Military Academy
AktivitéitAffekot, Geschäftspersoun, Direkter, Offizéier, Politiker
ParteiRepublican Party

Karriär

De Pompeo ass e fréieren Arméisoffizéier an huet 1986 d'Militärakademie ofgeschloss. No senger militärescher Karriär huet hien Droit op der Harvard Universitéit studéiert[1]. Duerno huet hien Thayer Aerospace matgegrënnt, e Betrib, deen an der Zouliwwerindustrie fir déi zivil an industriell Loftfaart aktiv war. 2006 huet de Pompeo seng Bedeelegung un där Entreprise verkaaft an ass President vu Sentry International ginn, enger Entreprise, déi schwéiert Ekipement fir d'Pëtrollsfërderung bereetstellt.

Wéi d'Tea-Party-Beweegung 2009/2010 opkoum, ass de Pompeo Member bei der republikanescher Partei ginn. 2010 ass hien du fir de Kansas an d'Representantenhaus, déi ënnescht Chamber vum Kongress vun de Vereenegte Staaten, gewielt ginn.[1] Am November 2016 huet den neigewielten US-President Donald Trump de Pompeo als neien Direkter vun der CIA nominéiert[2]. Déi Nominatioun ass am Januar 2017 vum Senat bestätegt ginn[3]. De Pompeo hat déi Plaz bis Abrëll 2018. Dunn huet de President Trump de Pompeo zum Ausseminister ernannt, nodeems en deem säi Virgänger, de Rex Tillerson entlooss hat.

A senger Funktioun als Chef vun der CIA an als Ausseminister huet sech de Pompeo fir eng enk Bezéiung tëscht den USA a Saudiarabien agesat. Hien hat och vill derzou bäigedroen, datt et den historesche Sommet tëscht dem Donald Trump an dem nordkoreanesche Leader Kim Jong-un 2018 zu Singapur gouf, an datt sech d'amerikanesch Bezéiunge mam Iran a mam Venezuela verschlechtert hunn[4],[5],[6].

Biller

Um Spaweck

Commons: Mike Pompeo – Biller, Videoen oder Audiodateien

Referenzen