Ruiselede

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Ruiselede mèt aongrenzende (deil)gemeintes (zuug de hoofteks veur 'n verklaoring).

Ruiselede (Wes-Vlaams: Ruselee, Oos-Vlaams: Ruiselee) is e dörp en 'n gemeinte in de Belzje provincie Wes-Vlaandere, arrondissemint Tielt, tege de grens mèt Oos-Vlaandere. De gemeinte mit 30,2 km² en had op 1 januari 2010 5.177 inwoeners.

In Ruiselede sprik me vaanajds 'n Oos-Vlaams dialek. De teikene zien evels tot in 't grensgebeed vaan de provincies de joongere 't Wes-Vlaams euvernumme. Of dit in Ruiselede ouch zoe is, is neet gans dudelek.

Geografie

Deilgemeintes

Ruiselede heet gein deilgemeintes. Wel zien dao twie kleinder kerne binne de gemeintegrenze.

I. Ruiselede
- II. Doomkerke
- III. Kruiskerke

Aongrenzende (deil)gemeintes

a. Kanegem (stad Tielt)
b. Tielt (stad Tielt)
c. Schuiferskapelle (stad Tielt)
d. Wingene, mèt 't dörp Sint-Jan (gemeinte Wingene)
e. Beernem (gemeinte Beernem)
f. Aalter, mèt 't dörp Maria-Aalter (gemeinte Aalter, Oos-Vlaandere)
g. Lotenhulle (gemeinte Aalter, Oos-Vlaandere)
h. Poeke (gemeinte Aalter, Oos-Vlaandere)

Historie

In de bojem zien prehistorische en Romeinse voondste gedoon. De plaots weurt veur 't iers geneump in 1106, es bezit vaan de Bertinusabdij in Sint-Omaars (Fraankriek). In de iewe daonao waor 't groondgebeed versnipperd tösse väöl versjèllende hiere. In 1688 stiechde me e spinhoes. Oet de religieuze gemeinsjap oontstoont in de negentienden iew e vrouwekloester: de kónkergatie vaan Zösters vaan Slevrouw vaan Zeve Weie. 't Mojerkloester zit nog ummertouw in Ruiselede. In 1849 kaom dao e tehoes veur landluipers en weize, wat es gemeinsjapsinstèlling veur bezundere bijstand nog ummer besteit. Op 8 september 1944 lieverde de Poolse soldaote hei slaag mèt de Pruse. Bij de herindeilinge vaan 1973 en 1977 bleef Ruiselede gespaord.