ဝင်းမြတ်အေး
ဒေါက်တာ ဦးဝင်းမြတ်အေး (၁ ဇွန် ၁၉၅၄ မွေးဖွား) သည် မြန်မာနိုင်ငံသား နိုင်ငံရေးသမားနှင့် ပဲခူးတိုင်းဒေသကြီး မဲဆန္ဒနယ် ၄ ကိုယ်စားပြု အမျိုးသားလွှတ်တော် အမတ်အဖြစ် ဆောင်ရွက်ခဲ့သူဖြစ်သည်။ သူသည် ကလေးအထူးကုဆရာဝန်တစ်ဦး ဖြစ်ပြီး ဆေးတက္ကသိုလ် (မကွေး)၏ ပါမောက္ခချုပ် အဖြစ် တာဝန်ထမ်းဆောင်ခဲ့သူ ဖြစ်သည်။ ၂၀၁၆ မတ်လ ၂၂ ရက်မှ ၂၀၂၁ ခုနှစ် ဖေဖော်ဝါရီလ ၁ ရက်နေ့အထိ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးအဖြစ် တာဝန်ထမ်းဆောင်ခဲ့သည်။[၁][၂][၃][၄]
ဒေါက်တာ ဝင်းမြတ်အေး | |
|---|---|
 | |
| လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီး (အမျိုးသားညီညွတ်ရေးအစိုးရ) | |
တာဝန်ထမ်းဆောင်ဆဲ | |
| တာဝန် စတင် ၁၆ ဧပြီ ၂၀၂၁ | |
| လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီး | |
| တာဝန်သက်တမ်း ၃၀ မတ် ၂၀၁၆ – ၁ ဖေဖော်ဝါရီ ၂၀၂၁ | |
| ယခင်လူ | ဒေါ်မြတ်မြတ်အုန်းခင် |
| ဆက်ခံသူ | ဒေါက်တာသက်သက်ခိုင် |
| အမျိုးသားလွှတ်တော် ကိုယ်စားလှယ် | |
| တာဝန်သက်တမ်း ၁ ဖေဖော်ဝါရီ ၂၀၁၆ – ၃၀ မတ် ၂၀၁၆ | |
| မဲဆန္ဒနယ် | ပဲခူးတိုင်းဒေသကြီး မဲဆန္ဒနယ် ၄ |
| ဆေးတက္ကသိုလ် (မကွေး) ပါမောက္ခချုပ် | |
| တာဝန်သက်တမ်း ၁၃ ဇန်နဝါရီ ၂၀၁၁ – ၃၀ မေ ၂၀၁၄ | |
| ဆက်ခံသူ | ဒေါက်တာအေးထွန်း |
| ကိုယ်ရေး အချက်အလက်များ | |
| မွေးဖွား | ဇွန် ၁၊ ၁၉၅၄ ပြွန်တန်ဆာမြို့၊ ပဲခူးတိုင်း၊ မြန်မာနိုင်ငံ |
| လူမျိုး | မြန်မာ |
| နိုင်ငံရေးပါတီ | အမျိုးသားဒီမိုကရေစီအဖွဲ့ချုပ် |
| ကြင်ဖော်(များ) | ဒေါက်တာမြသီတာ |
| သားသမီး | ၁ |
| နေထိုင်ရာ | တောင်ဥက္ကလာပမြို့နယ်၊ ရန်ကုန်မြို့ |
| မိခင်ကျောင်း | ဆေးတက္ကသိုလ်(၁) ရန်ကုန် |
| အလုပ်အကိုင် | နိုင်ငံရေးသမား၊ ကလေးအထူးကုဆရာဝန် |
| ကိုးကွယ်သည့်ဘာသာ | ထေရဝါဒ ဗုဒ္ဓဘာသာ |
ဒေါက်တာဝင်းမြတ်အေးသည် အမျိုးသားညီညွတ်ရေးအစိုးရအဖွဲ့၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန၏ ပြည်ထောင်စုဝန်ကြီး ဖြစ်သည်။
အစောပိုင်းဘဝနှင့် ပညာရေး
ဦးဝင်းမြတ်အေးကို ၁၉၅၄ ခုနှစ် ဇွန်လ ၁ ရက်နေ့တွင် ပဲခူးတိုင်း၊ ပြွန်တန်ဆာမြို့တွင် မွေးဖွားသည်။ ၁၉၈၀ မတ်လတွင် ဆေးပညာဘွဲ့၊ ၁၉၉၄ ဖေဖော်ဝါရီတွင် ဆေးပညာမဟာသိပ္ပံဘွဲ့ (ကလေးကျန်းမာပညာ) နှင့်[၅] ၂၀၀၆ အောက်တိုဘာလတွင် ဆေးလက်တွေ့ပါရဂူဘွဲ့ (ကလေးကျန်းမာပညာ) များကို ဆေးတက္ကသိုလ်(၁) ရန်ကုန်မှ ရရှိခဲ့သည်။[၅]
နိုင်ငံဝန်ထမ်းဘဝ
ဦးဝင်းမြတ်အေးသည် ၁၉၈၈ ခုနှစ်မှ ၁၉၉၈ ခုနှစ်အထိ လက်ထောက်ဆရာဝန် ရာထူးဖြင့် ရန်ကုန်ကလေးဆေးရုံကြီး တွင် လည်းကောင်း၊ ၂၀၀၁ ခုနှစ်မှ ၂၀၀၄ ခုနှစ်အထိ ဝေဘာဂီဆေးရုံကြီးတွင် အထူးကုဆရာဝန် (ကလေးကျန်းမာ) တာဝန်များကို ထမ်းဆောင်ခဲ့သည်။[၆] ၂၀၀၄ ခုနှစ်မှ ၂၀၀၆ ခုနှစ်အထိ ကထိက၊ ၂၀၀၆ ခုနှစ်မှ ၂၀၀၇ ခုနှစ်အထိ တွဲဖက်ပါမောက္ခတာဝန်များကို ဆေးတက္ကသိုလ် (မကွေး)တွင် လည်းကောင်း၊ ၂၀၀၇ ခုနှစ်မှ ၂၀၁၀ ခုနှစ်အထိ တွဲဖက်ပါမောက္ခ၊ ၂၀၁၀ ခုနှစ်မှ ၂၀၁၁ ခုနှစ်အထိ ပါမောက္ခအဖြစ် ဆေးတက္ကသိုလ်(၁) ရန်ကုန်တွင်လည်းကောင်း တာဝန်ထမ်းဆောင်ခဲ့သည်။ ၂၀၁၁ ခုနှစ် ဇန်နဝါရီ ၁၃ တွင် ဦးဝင်းမြတ်အေးသည် ဆေးတက္ကသိုလ် (မကွေး)၏ ပါမောက္ခချုပ်အဖြစ် ၂၀၁၄ ခုနှစ် မေလ ၃၀ ရက်နေ့ အငြိမ်းစားယူသည်အထိ တာဝန်ထမ်းဆောင်ခဲ့သည်။[၆]
နိုင်ငံရေးလုပ်ကိုင်ခြင်း
၂၀၁၅ အထွေထွေ ရွေးကောက်ပွဲတွင် ပဲခူးတိုင်းဒေသကြီး မဲဆန္ဒနယ် ၄ မှ အမျိုးသားလွှတ်တော် ကိုယ်စားလှယ်နေရာကို အမျိုးသားဒီမိုကရေစီအဖွဲ့ချုပ်မှ ဝင်ရောက်ယှဉ်ပြိုင်ခဲ့ရာ အနိုင်ရရှိခဲ့သည်။[၇]
မိသားစု
သူသည် သားဖွားမီးယပ်ဆရာဝန်ကြီး ပါမောက္ခ ဒေါက်တာ ဒေါ်မြသီတာနှင့် လက်ထပ်ခဲ့သည်။