L'attacco d''e giajante
L'attacco d''e giajante (進撃の巨人 Shingeki no kyojin) è nu manga 'e jenere dark fantasy postapucalitteco scritto e ddesignato 'a Hajime Isayama, serializzato 'nGiappone ncopp''a revista Bessatsu Shōnen Magazine 'e Kōdansha dô 9 settembre 2009 ô 9 abbrile 2021. Ll'edizione taliana è prubbecata 'a Planet Manga, etichetta d''a Panini Comics, dô 22 màrzo 2012 ô 28 ottovre 2021 dint''a cullana Generation Manga.
L'opera è ammientata dinto nu munno arrò 'e superstite 'e ll'umanità vivono ô ntierno 'e cetà circunnate 'a enurme mura defenzeve a ccausa d''a mpruvvesa cumparsa d''e giajante, enurme criature umanoide ca devurano 'e uommene senza nu mutevo apparente. 'A storia ròta attuorno ô giovane Eren Jaeger, a ssora adutteva soja Mikasa Ackermann e ô ammico 'e nfanzia lloro Armin Arelet, 'e cui vite veneno stravolte 'a ll'attacco 'e nu giajante culossale e nu giajante curazzato, ca cunnuce â destruzione d''a cetà lloro e â morta d''a mate d'Eren.
L'attacco d''e giajante have uttenuto nu successo mmediato. È stato ntra 'e 13 manga a rrecevere na nomination p''o premio Manga Taishō dint''o 2011[1], havve abbenciuto 'o Premio Kōdansha p''e manga dint''a categgurìa megliore manga pe uagliune[2] e è stato nummenato â sirecesema e â deciottesema edizione d''o Premio culturale Osamu Tezuka[3][4].
Dô manga è stata tratta na serie televiseva anime 'e quatto staggione, 'e primme treje realizzate 'a Wit Studio e ll'urtema dô sturio MAPPA. 'A primma staggione è stata trasmessa dint''o 2013[5], 'a seconna dint''o 2017[6], 'a terza ntra 'o 2018 e 'o 2019[7], e 'a quarta, ntitulata Stagione finale (Final Season), d''o 2020[8]. Sonno state prudutte pure quatto film anime riassuntive p''o cinema, n'adattamiento live action e nnumeruse opere derivate e spin-off, quale videojuoche, manga e llight novel.
Ammientazione
Dinto nu munno alternatevo 'a razza umana è stata decemata 'a ll'abbento d''e giajante (巨人 kyojin?), granne criature, fisecamente sìmmele a ll'ommo, d'autezza cumpresa ntra 'e treje e 'e quinnice mietre e ca nun pussedeno n'apparato repruduttevo. Sonno essiere primmitive e ddâ ntellegenza limitata, ca nun pareno necessetà 'e magnà pe vvivere, ma ca attaccano ll'umane e ngorfejano 'e cuorpe lloro.
Trama
 | « Chello juorno ll'umanità allecurdaje... 'o terrore d'essere cuntrullata 'a lloro... l'umiliazione 'e vivere comme auccielle dinto cajola... » |
(Nnizio do manga L'attacco de giajante[9].) |
Dinto ll'anno 845 cumpà nu giajante auto circa sissanta mietre ca c nu caucio cria na vreccia dint''a cinta esterna d''o Wall Maria, arrò 'o destretto 'e Shiganshina. 'E giajante nniziano a trasì e mmadeno 'a cetà devuranno quante cchiù umane pussibbile, tramente chiste asciano nnutilmente 'e defennerse e trasferì cchiù gente pussibbile ô ntierno d''a seconna cherchia 'e mura; ma primma ca 'e uommene riescano a chiudere 'a porta nterna d''e mura, nu giajante curazzato 'a sfunna cu nu corpo e 'e umane sonno custrette a rrepiegà ncopp''o Wall Rose. 'Nsequito tentano na desperata recunquesta d''o territorio perduto, circa nu terzo d''o tutale, ca fallesce miseramente. L'enorme perdeta 'e uommene cuntribuesce p''o meno a attenuà 'a carestia 'e magnà criatase p''a perdeta 'e na porzione territoriale accussì granne. 'O giajante culossale e cchello curazzato sparescono misteriosamente aroppo avé spianato 'a strata ê sìmmele lloro.
nFra 'e supravvissute â tragedia ve sonno 'e treje prutagoniste d''a storia: Eren Jaeger, Mikasa Ackermann e Armin Arelet. Dint''o juorno 'e ll'irruzione d''e giajante, Eren perde mate soja, ca vene devurata annanze ê uocchie suoje. Ll'accaruto gennera dint''o criaturo, già mpulsevo 'e natura, n'odio vierzo 'e giajante superiore â paura dint''e cunfrunte lloro, e ggiura 'e stermenarle tutte. Mikasa è n'orfana ca aroppo 'a perdeta d''e geniture suoje have veruto abbascio 'a scella prutetteva d''a famiglia Jaeger, ma chello juorno — accussì comme Armin, 'o megliore ammico d'Eren — pure isso perde tutto. A ccinco anne 'e destanza 'a ll'accaruto 'e treje ammice sonno cresciute e ssonno trasute a ffà parte 'e ll'eserceto, quanno 'e giajante se presentano novamente. P'Eren, Mikasa, Armin e ll'ate reclute nnizia accussì nu crudele vattìsemo d''o fuoco.
Perzunagge
- Eren Jaeger (エレン・イェーガー Eren Yēgā?) è 'o protagonista d''a storia e vvene d''o destretto 'e Shiganshina. Mate soja vene devurata 'a nu giajante aroppo ca 'o giajante culossale have criato na vreccia dint''e mura permettenno accussì ê giajante 'e trasì dint''o destretto 'e Shiganshina e scatenà 'o panico. Ll'obiettevo suojo è chello 'e stermenà tutt''e giajante, pe vvennecà 'a razza umana. È mpulsevo, viulento e idealista.
- Mikasa Ackermann (ミカサ・アッカーマン Mikasa Akkāman?) è 'a sora adutteva d'Eren. Aroppo 'a morta d''e geniture, accise 'a alcune traffecante d'umane, 'a uagliona è addeventata particularmente fridda. È legata assaje a Eren, ca l'have sarvata e l'have rirato nu mutivo pe vvivere, pe cchesto ndossa sempe 'a sciarpa rossa ca isso l'have regalato. È ncreribbilmente abbile dint''o cummattemento e vvene cunziderata nu uerriero d'élite. Nfatto dint''o cuorso suojo d'addestramento cariette, vene recanusciuta subbito comme na d''e cchiù brave allieve 'e sempre, classifecannose primma ô diploma d''e cariette.
- Armin Arelet (アルミン・アルレルト Arumin Arureruto?) è n'ammico d'Eren e Mmikasa. È fisecamente e psiculogecamente debbole, ma ntelligente assaje, nfatto addeventa nu stratega, aroppo esserse arrulato dinto ll'eserceto cu Eren e Mmikasa. Se demostra sempe assaje poco nclene ô scuntro fiseco, preferenno l'auso d''a parola.
- Levi Ackerman (リヴァイ・アッカーマン Rivai Akkāman?) è 'o capetanejo d''a Squatra Operazione Speziale ô ntierno 'e ll'Armata Recugniteva. È cunziderato 'o surdato cchiù forte 'e ll'umanità.