Bassen (Landkreis Deefholt)

Bassen liggt in’n Süüdoosten vun den Naturpark Wilshuser Geest, bi 25 km in’n Süden vun Bremen. Dor flutt de Klosterbäke hendör. De ööstlichste Oortsdeel Neebrooksen liggt an den övern Loop vun de Hache.

De Stadt sett sik ut düsse Stadtdelen tohopen:

• Albernhusen
• Apstee (mit Panstee)
• Bramstee (mit Bünte un Röllinghusen)
• Eschenhusen
• Groten Henstee
• Groten un Lüttjen Remer
• Hallstee
• Hollwä'e (mit Dimhusen, Hilken, Katenkamp, Nüstedt, Lütten un Groten Hollwä'e)
• Neebrooksen (mit Freedörp)
• Nienstedt
• Noordwohlde (mit Stütelbarg, Fesenfeld, Kassendiek, Steenforth, Högenhusen un Pestinghusen)
• Oosterbinde
• Schorlingbössel (mit Ebersheide, Lowe un Kolloge)
• Stühren
• Wedehoorn
• Stadt Bassen mit siene olen Stadtdelen Bassen, Loge un Freudenbarg

In dat Johr 858 hett de Eddelfro Liutgart ehr Arv an den Arzbischop Ansgar vun dat Arzbisdom Bremen schunken. He scholl dor „en Gemeen vun hillige Jumfern“ grünnen. Dor stell he dat Stift „Birxinon“ (Bassen) up'e Been. In dat Stift leven keen Nonnen, man Kanonissen. Dat weern Jumfern ut'n Adel, de na de Akener Kanonissenregel ut dat Johr 816 tohopenleven. Anners, as Nonnen dröffen se de Gemeen wedder verlaten un se dröffen ok Egendom hebben. König Otto I. hett in dat Johr 937 noch mol utdrücklich sien Unnerschrift to düt Stift geven. De Kanonissen ehre Upgave weer dat Beden för de Lebennigen un de Doden un dat se Gott fierlich Loff geven döen. Later höör Bassen bit 1582 to de Graafschop Hoya. De Greven vun Hoya hefft woll ok, nich wiet af vun dat Stift, dat Slott „Vroydenbergh“ boot. 1541 hett de Greve Jobst I. de Reformatschoon in dat Stift inföhrt. 1582 keem dat Stift an dat Huus vun de Welfen. 1866 is Bassen denn mit dat ganze Königriek Hannober na Preußen kamen. Stadtrechten hett Bassen eerst an’n 16. November 1929 kregen. Bit dorhen weer Bassen Flecken. Bi de Gemeendereform 1974 is Bassen en Eenheitsgemeende wurrn un al de Dörper dor ümto sünd Deel vun düsse Gemeende wurrn.

Inwahnertall

Stadtraat

Vörsitter vun den ganzen Raat is Henning Meyer (CDU).

Börgermeester

As Börgermeester is 2014 Krischan Porsch in’t Amt kamen. Siene Stellvertreders sünd Cathleen Schorling (CDU), Bärbel Ehrich (SPD) un Jürgen Falck (BB).

Ehr Wapen hett de Stadt Bassen an’n 24. November 1927 kregen. De Magistrat harr vördem an’n 24. März beslaten, nu scholl dat Stadtfarven un ok en Wapen för Bassen geven. Dor is nu en tweedeelten Schild up to sehn. In de böverste Hälft finnt sik up witten Grund dree gröne Linnenblöer an en Ast, de wiest na baven. In Bassen gifft dat massig Linnen, dor hett de Stadt ok den Ökelnaam „Linnenstadt“ üm kregen. De dree Blöer schöllt henwiesen up de dree Flecken Bassen, Loge un Freudenbarg. De harrn sik al 1896 tohopenslaten unner den Naam „Bassen“. In de ünnere Hälft vun dat Schild gifft dat up gelen Grund twee Borenklauen to sehn, de wiest na buten. Düsse Klauen sünd dat Teken vun de Greven to Hoya, wo Bassen ja bit 1582 henhöört harr.

Över dat ganze Wapen finnt sik denn noch en Muerkroon. Dat wiest up de Borg Freudenborg hen. Üm dat Wapen to staht noch twee sülvern Peer, as Teken för Neddersassen. De Stadtfarven Gröön, Witt, Geel kaamt vun düt Wapen her.

De Stadt Bassen ünnerhöllt en Frünschup mit de franzöösche Stadt Fresnay-sur-Sarthe un de ingelsche Stadt Spilsby.

Stiftskark Bassen

De gootsche Backsteenkark ut de Midden vun dat 13. Johrhunnert is för de ganze Gegend en bedüdend Bowark, wat de Kunsthistorie angeiht. Dor gifft dat dat beröhmte „Bassener Sulenbünnel“ in to sehn un ok en Reeg vun Epitaphen för de Vörsitterschen vun dat Froensklooster. Ganz wat besunners is ok de Footbodden ut Gips. He finnt sik in den Chorruum vun de Karken, de 2005 wedder up Schick bröcht wurrn is. In dat süüdliche Dweerschipp is dat Graff vun de Vörsittersche Anna Greevsche vun Hoya ut dat Johr 1585 to sehn. In dat sülvige Dweerschipp kann een sik ok de Standbiller vun den Hilligen Mauritius un den Hilligen Viktor ankieken. Dat sünd de Naamsppatrons vun düsse Kark.

Stift Bassen

In dat Stift ut dat 18. Johrhunnert is en ganze Reeg vun bedüdende Kunstschatten tohuse. Veel Lüde fohrt vundeswegen dor mol hen un kiekt sik de an.

De Freudenborg

Nich wiet af vun dat Stift liggt an de Klosterbeeke de Freudenborg. 1388 is to'n eersten Mol in en Urkunn wat vun ehr to lesen, man dat warrt annahmen, dat se veel öller is. Boot hett se woll de Greve Otto III. vun Hoya. Man dat warrt anners ok seggt, de Greven vun Ollenborg-Brooksen harrn ehr uprichten laten. De öllste Naam vun düsse Borg is „Vroydenbergh“. As dat Huus vun de Greven vun Hoya 1582 utstorven weer, keem de Flecken Freudenbergh in verscheden Hannen. Jedereen hett dor an dat Slott wat ännert. De olen Bowarken ut dat Middelöller sünd afreten wurrn. Bloß Wall un Graven un de Warft (Barg) sünd noch dor. Ut dat 14. Johrhunnert steiht noch en Amtstuuv, dat so nömmte „Backhuus“. Dor sünd denn in dat 16. Johrhunnert de Schrievstuuv vun dat Amt Freudenbergh un üm 1730 rüm dat Amsthuus tokamen. In de Midden vun de 1990er Johren is allens wedder nee up Schick bröcht wurrn.

• Projekt to'n Sammeln vun plattdüütsche Oortsnaams in de Landkreise Deefholt, Nienborg/Werser un Veern

Städer un Gemenen in den Landkreis Deefholt

Affinghusen |Asendörp |Baarnborg |Bornbössel |Baarnstrup |Barver |Bassen |Bössel |Brookm |Brooksen-Vilsen |Deefholt |Dickel |Drebber |Drentwede |Ehrenborg |Eidelstee |Engeln |Freestatt |Hemzel |Hüde |Karkdörp |Lembrouk |Lemförde |Maasen |Marl |Mattfeld |Mellgenhusen |Neenkarken |Quernheim |Rehrn |Scholen |Sie'enborg |Staaste |Stemshorn |Stuhr |Suwohle |Sulingen |Swabern |Swarm |Syke |Twustern |Varrel |Wagenfeld |Wehrbleck |Wetschken |Weyhe