Grafel (Gemeen Annerlingen)

Grafel liggt op de Zevener Geest so bi een Kilometer af von’n Beek Twiest.

De Naveröörd sünd Fehrenbrook in’n Noorden, Winnerswoold in’n Noordoosten, Kohlenhusen in’n Oosten, Wens un Viehbrook in’n Süüdoosten, Annerlingen in’n Süüdwesten un Ohrel in’n Noordwesten.

In’n Eersten Weltkrieg sünd acht Soldaten ut Grafel fullen oder vermisst.^[1]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Annerlingen in’n Kanton Sürsen höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Sürsen in’n Kanton Zeven.

De Oort hett vör 1859 to de Böörd Sürsen von dat Amt Zeven tohöört. Mit de Verwaltungsreform von 1859 in dat Königriek Hannover is de Böörd Sürsen denn an dat Amt Bremervöör wesselt. Na 1885 weer dat in’n Kreis Bremervöör. 1977 is de Oort Deel von’n Landkreis Rodenborg worrn.

1968 hett sik Fehrenbrook de Gemeen Grafel anslaten. De Gemeen Grafel is mit de Gemeenreform in Neddersassen an’n 1. März 1974 Deel von de Gemeen Annerlingen worrn. De noch egenstännige Gemeen weer von 1965 bet 1974 Deel von de Samtgemeen Sürsen. De is 1974 oplööst worrn un dor is de ne’e un gröttere Samtgemeen Sürsen billt worrn, to de de Oort sietdem tohöört.

* tohoop mit Winnerswohl un Mojenhoop

Grafel is evangeelsch-luthersch präägt un höört to dat Kaspel von de Lamberti-Kark in Sürsen.

En egen Karkhoff hett Grafel an dat Enn von dat 19. Johrhunnert kregen. Hinnerk Borcher, de an’n 11. Mai 1894 begraven worrn is, weer wohrschienlich de eerste, de op den ne’en Karkhoff to liggen keem.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

En Denkmaal för de Fullenen ut de twee Weltkrieg’ steiht in Sürsen bi de Kark.

De Freewillige Füürwehr is 1952 grünnt worrn.

Grafel liggt an de Kreisstraat 109, de in’n Süüdwesten na Annerlingen löppt un in’n Noordoosten na Fehrenbrook un Farm. Ans gifft dat lüttjere Straten na Ohrel un Winnerswoold.

De nächste Autobahn is de Autobahn 1 (Afsnidd Hamborg–Bremen). De Opfohrt 48 Elsdörp liggt so 22 Kilometer in’n Süden von Grafel an de L 131.

De nächste Bahnhoff is de Bahnhoff Kutenhult an de Bahnlien Bremerhoben–Buxthu, de so bi teihn Kilometer in’n Noorden liggt.

Dat eerste Schoolhuus hett Grafel 1850 kregen. De Volksschool hett denn so 100 Johr later wedder dichtmaakt.

• Dieter Borchers: Dorfchronik der Dörfer Grafel, Fehrenbruch, Winderswohlde, Mojenhop, Sprakel. 2002