Hu’e (Landkreis Veern)
| Wapen/Flagg | Koort | |
|---|---|---|
|
| |
| Basisdaten | ||
| Flach: | 37,94 km² | |
| Inwahners: | 3.195 | |
| Inwahnerdicht: | 84,2 Inwahners pro km² | |
| Hööchd: | 8 m över NN | |
| Postleettall: | 28870 | |
| Vörwahl: | 04293 | |
| Geograafsche Laag: | 53° 7′ N, 9° 3′ O | |
| ||
Hu’e (hoochdüütsch Fischerhude) is en Dörp in de Gemeen Otterbarg in’n Landkreis Veern, Neddersassen. Binnen de Gemeen Otterbarg billt Hu’e en polietsche Oortschop.
To Hu’e höört ok de Oortsdelen Breednau un Ebbensiek mit to.
Geografie
De Oort liggt op en lüttje Geestinsel twüschen de Arms von de Wümm. Dat Land ümto is allens sied Masch- un Moorland. In’n Süüdwesten liggt dat Naturschuulrebeed Hu’er Wümmdaal.
De Naveröörd sünd Willemshusen in’n Noorden, Suurheid un Quelkhoorn in’n Noordoosten, Breednau, Kamp un Otterbarg in’n Oosten, Bassen, Booköss un Sao’ern in’n Süden, Ebbensiek in’n Westen un Seebargen un Rutendorp in’n Noordwesten.
Historie
Hu’e kummt an’n 27. September 1124 as Widagheshude toeerst in en Oorkunn von Paapst Calixt II. vör, in de he bestätigt, dat de Oort Besitt von dat Klooster Rastäe is.
De Oort weer lange Tied en Fischerdörp. Dorüm is de Oort ok Fischerhu’e nöömt worrn, üm den Ünnerscheed to maken to Ridderhu’e an de Hamm.
To Anfang von dat 20. Johrhunnert hebbt sik veel Künstlers in Hu’e un in de Breednau dallaten un dor hett sik de Künstlerkolonie Hu’e billt.
Verwaltungsgeschicht
In de Franzosentied von 1810 bet 1814 weer de Oort Seet von de Mairie Hu’e in’n Kanton Otterbarg. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to de Amtsvaagdie Wilst in dat Amt Otterbarg tohöört un denn von 1859 bet 1885 to dat Amt Achem. Na 1885 weer dat in’n Kreis Achem, de 1932 Deel von’n Kreis Veern worrn is.
De Oort is 1968 mit Quelkhoorn to een Gemeen tohoopgahn. Düsse ne’e Gemeen is an’n 1. Juli 1972 mit de Gemeenreform in Neddersassen Deel von de Gemeen Otterbarg worrn. Sietdem is Hu’e en polietsche Oortschop mit egen Oortsraad un Oortsbörgermeester.
Inwahnertall
| Johr | Inwahners |
|---|---|
| 1791[1] | 42 Füürsteden |
| 1812[2] | 444 |
| 1824[3] | 95 Füürsteden |
| 1848[4] | 601 Lüüd, 107 Hüüs |
| 1. Dezember 1871[5] | 710 Lüüd, 124 Hüüs |
| 1. Dezember 1885[6] | 703 Lüüd, 125 Hüüs |
| 1. Dezember 1905[7] | 697 Lüüd, 138 Hüüs |
| 1. Dezember 1910[8] | 781 |
| 1925[9] | 860 |
| 1933[9] | 876 |
| 1939[9] | 843 |
Religion
Hu’e is evangeelsch-luthersch präägt un billt mit de Leevfroon-Kark en egen Kaspel. De Kark is 1494 as Kapell anleggt worrn. De Oort hett aver noch bet 1859 to dat Kaspel von de Petri-Kark in Wilst tohöört.
För de Kathoolschen is de St.-Matthias-Kark in Achem tostännig.
De eerste Karkhoff in Hu’e is 1825 üm de Kapell rüm anleggt worrn. Vörher sünd de Lüüd bi de Kark in Wilst begraven worrn. Later hebbt se denn en ne’en Karkhoff an’n Brügghoff anleggt.
Wapen
Dat Wapen von Hu’e wiest baven op gollen Grund twee swarte Peerköpp as Gevelsmuck un ünnen op blauen Grund en sülvern Fisch.
Dat Wapen hett de Gemeen Hu’e 1955 kregen.
Oortsraad
| Johr \ Partei | Tall | CDU | SPD | Gröne | FGBO |
|---|---|---|---|---|---|
| 2011 | 7 | 2 | 2 | 2 | 1 |
| 2016 | 7 | 3 | 1 | 1 | 2 |
Oortsbörgermeesters
- 2011–: Wilfried Mittendorf (FGBO)
Kultur
In’n Oort gifft dat en Reeg Museums, Galerien un Ateliers to de Künstlerkolonie Hu’e.
Verenen
De Schüttenvereen Hu’e is 1923 grünnt worrn.
Weertschop un Infrastruktur
De freewillige Füürwehr Hu’e is 2009 mit de Füürwehr Quelkhoorn tohoopgahn un billt nu de Füürwehr Hu’e-Quelkhoorn.
Verkehr
Dör Hu’e löppt de Kreisstraat 2, de in’n Noorden in Willemshusen an de Landsstraat 154 ran geiht un in’n Süüdwesten över Sao’ern na Eiten an de L 168 ran. De L 154 geiht in’n Noordwesten över Rutendorp un Seebargen na Falkenbarg bi Leendaal un in’n Oosten över Otterbarg un Söttmer na Rodenborg.
De nächste Autobahn is de Autobahn 1 (Afsnidd Hamborg–Bremen). De Opfohrt 52 Eiten liggt so teihn Kilometer in’n Süüdwesten von Hu’e an de L 167.
De nächste Bahnhoff is so bi fiev Kilometer wied weg in’n Süüdwesten de Bahnhoff Sao’ern an de Bahnlien Hamborg–Bremen.
Scholen
De Kinner gaht na de Grundschool Hu’e. Na de 4. Klass wesselt se in de Regel op de Oberschool Wümmschool in Otterbarg oder op dat Gymnasium Otterbarg.
Lüüd
To de Künstlers ut Hu’e, kiek in’n Artikel to de Künstlerkolonie Hu’e.
Literatur
- Johann-Günther König: Fischerhude. Die Geschichte eines Dorfes. Brockkamp Verlag, Bremen 1982, rutgeven von: Freundeskreis Fischerhude e. V., ISBN 3922496407
- Jürgen Schultze (Rutgever), Johann-Günther König, Günter Busch, Gerhard Gerkens: Künstler in Fischerhude. Brockkamp Verlag, Bremen 1984, ISBN 3922496601
Footnoten
Weblenken
Hu’e (Landkreis Veern). Mehr Biller, Videos oder Audiodateien to’t Thema gifft dat bi Wikimedia Commons.- private Websteed över dat Dörp (hoochdüütsch)
