Niendörp (Landkreis Horborg)
| Wapen/Flagg | Koort | |
|---|---|---|
|
| |
| Basisdaten | ||
| Inwahners: | ||
| Postleettall: | 21271 | |
| Vörwahl: | 04184 | |
| Geograafsche Laag: | 53° 14′ N, 10° 1′ O | |
| ||
Niendörp (achtern Wohl) (hoochdüütsch Nindorf am Walde) is en Dörp in de Gemeen Hanstää (Samtgemeen Hanstää) in’n Landkreis Horborg, Neddersassen.
Geografie
De Oort liggt in de Lümbörger Heid. Dat Naturschuulrebeed Lümbörger Heid liggt in’n Westen. Niendörp is an dat Över von de Smale Au.
De Naveröörd sünd Hanstää in’n Noorden, Toppenstää in’n Noordoosten, Garlstörp in’n Oosten, Lübberstää un Äästörp in’n Süüdoosten, Giesenbarg un Schätzendörp in’n Süden, Ollsen un Unnel in’n Süüdwesten, Wesel in’n Westen un Schierhoorn, Drumbargen un Diekshuus in’n Noordwesten.
Historie
Niendörp kummt 1162 toeerst in de Oorkunnen vör.
In’n Eersten Weltkrieg sünd twölv Soldaten ut Niendörp fullen oder vermisst un in’n Tweten Weltkrieg 20.[1]
Verwaltungsgeschicht
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Diekshuus in’n Kanton Garlstörp höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Garlstörp in’n Kanton Garlstörp.
De Oort hett vör 1885 to de Amtsvaagdie Garlstörp von dat Amt Winsen tohöört. Blots in de Johren 1852 bet 1859 hett de Oort för en Tied to dat Amt Solzhusen höört. Na 1885 weer dat in’n Kreis Winsen un 1932 is dat Deel von’n Kreis Horborg worrn.
De Oort hett fröher en egenstännige Gemeen billt. De Gemeen Niendörp is an’n 1. Juli 1972 mit de Gemeenreform in Neddersassen Deel von de Gemeen Hanstää worrn.
Inwahnertall
| Johr | Inwahners |
|---|---|
| 1791[2] | 12 Füürsteden |
| 1812[3] | 182 |
| 1824[4] | 12 Füürsteden |
| 1848[5] | 155 Lüüd, 17 Hüüs |
| 1. Dezember 1871[6] | 133 Lüüd, 17 Hüüs |
| 1. Dezember 1885[7] | 148 Lüüd, 21 Hüüs |
| 1. Dezember 1905[8] | 144 Lüüd, 24 Hüüs |
| 1. Dezember 1910[9] | 158 |
| 1925[10] | 165 |
| 1933[10] | 158 |
| 1939[10] | 163 |
Religion
Niendörp is evangeelsch-luthersch präägt un höört to dat Kaspel von de Stephanus-Kark in Äästörp.
För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.
De Karkhoff Niendörp liggt in de Straat An’t Audaal.
Wapen
Dat Wapen von Niendörp wiest op gollen Grund in gröön en Dann un en Ekenboom. Dat is dat Naturdenkmaal Ehpoor bi Niendörp.
Kultur
En Denkmaal för de Fullenen ut de twee Weltkrieg’ steiht in Niendörp op’n Karkhoff. Na’n Eersten Weltkrieg is toeerst an’n 10. August 1924 en Denkmaal vör de School opstellt worrn. Na’n Tweten Weltkrieg is dat Denkmaal op’n Karkhoff opstellt worrn. Tosätzlich is an’n 16. Dezember 1956 en Denkmaal för de Fullenen ut’n Tweten Weltkrieg opstellt worrn.
In’n Oosten von’n Oort liggt siet 1970 de Wildpark Lümbörger Heid.
Bruukdom
In Niendörp warrt in’n Winter Faslam fiert. To Oostern gifft dat en Oosterfüür un to’n 1. Mai warrten Maiboom opstellt.
Weertschop un Infrastruktur
Niendörp hett en egene freewillige Füürwehr, de an’n 17. Juni 1911 grünnt worrn is. Vörher hett dat en Plichtfüürwehr geven.
Verkehr
Dör Niendörp löppt de Landsstraat 213, de in’n Noorden över de Öörd Hanstää, Asendörp, Jesborg, Harmsdörp un Helmsdörp na Hittfeld geiht un in’n Süüdoosten över Sohrndörp na Äästörp an de L 212. In’n Oosten geiht von de L 213 de L 216 af, de över Garlstörp na Solzhusen föhrt.
De nächste Autobahn is de Autobahn 7 (Afsnidd Hamborg–Hannover). De Opfohrt 40 Garlstörp liggt so veer Kilometer in’n Oosten von Niendörp an de L 216.
De nächste Bahnhoff is so bi 14 Kilometer wied weg in’n Noordwesten de Bahnhoff Büsenbeekdaal an de Heidbahn.
Scholen
De Kinner ut Niendörp gaht na de Grundschool Hanstää. De Volksschool in Niendörp hett 1971 dichtmaakt.
Literatur
- Ehrich Reins: Nindorfer Dorfbuch. Nindorf am Walde zur 800-Jahr-Feier. Gebrüder Ravens, Winsen 1962
Footnoten
Weblenken
Niendörp (Landkreis Horborg). Mehr Biller, Videos oder Audiodateien to’t Thema gifft dat bi Wikimedia Commons.- Websteed över dat Dörp (hoochdüütsch)