Padingbüddel
Padingbüddel is en Dörp in dat Land Wusten un billt en Oortschop binnen de Gemeen Wuster Noordseeküst in’n Landkreis Cuxhoben. De Gemeende liggt nich wiet af vun de Noordsee. De Kark un dat egentliche Dörp sünd bi dree Kilometer vun de Noordsee af. Annere Delen vun düt Dörp in de Masch liggt dor dichter an. Blangen den Oort Padingbüddel höört dor ok noch de Dörper Rotthusen, Böverstreek un Nedderstreek un Olendiek to.
| Wapen/Flagg | Koort | |
|---|---|---|
|
| |
| Basisdaten | ||
| Flach: | 9,42 km² | |
| Inwahners: | 479 (31. Dezember 2010) | |
| Inwahnerdicht: | 50,8 Inwahners pro km² | |
| Hööchd: | 1 m över NN | |
| Postleettall: | 27632 | |
| Vörwahl: | 04742 | |
| Geograafsche Laag: | 53° 42′ N, 8° 32′ O | |
| Grenzen bi OSM: | 1526834  | |
 | ||
| ||
Historie
De eersten Wurten hefft de Sassen in dat 1. bit 5. Johrhunnert boot. Bi dat grote Völkerwannern hefft denn de Sassen dat Land Wusten verlaten un Fresen sund in dat Land trocken. De Naam vun den Oort Padingbüddel steiht to'n eersten Mol an'n 5. März 1365 in en Urkunn.
Kark
In Padingbüddel steiht en ole Kark. Dat is de St. Matthäus-Kark ut dat 13. Johrhunnert. De Predigtstohl is ut dat Johr 1652 un de Altaar kümmt vun 1480. In dat 15. Johrhunnert is de Toorn in'n Westen anboot wurrn. Hüdigendags is de Gemeende evangeelsch-luthersch un höört to de Hannöbersche Kark hento. De Kark liggt up en Warft un en olen Karkhoff is ümto anleggt.
Inwahners
| Johr | Inwahners |
|---|---|
| 1848[1] | 587 Lüüd, 110 Hüüs |
| 1858[2] | 516 |
| 1888 | 516 |
| 1. Dezember 1910[3] | 549 |
| 1925[4] | 557 |
| 1933[4] | 525 |
| 1939[4] | 490 |
| 1964 | 595 |
| 1978 | 616 |
| 1988 | 595 |
| 1993 | 549 |
| 1998 | 534 |
| 2003 | 483 |
| 31. Dezember 2010 | 479 |
Politik
Gemeenraad (bet 2014)
| Johr \ Partei | Tall | CDU | SPD |
|---|---|---|---|
| 2001 | 9 | 3 | 6 |
| 2006 | 7 | 3 | 4 |
| 2011 | 7 | 3 | 4 |
Börgermeesters
| Tied | Naam | Partei |
|---|---|---|
| –31. Dezember 2014 | Helwig Tepke | SPD |
Siet 1. Januar 2015 hett de Oortschop en Oortsvörsteiher.
Wapen
Dat Wapen vun Padingbüddel is spleten. Vörn sitt up grönen Grund dree sülvern Kleverblöer, achtern up sülvern Grund en swarten Adler mit en sülvern Kroon. Düt Wapen is hernahmen vun dat Wapen vun den Böver- Diekgreve Eibe Siade Johanns. De leev vun 1659 bit 1720. Düt Wapen sitt ok tomidden de Gemeendeflagg, de to glieke Delen in gröön-witt-grööne Striepen ünnerdeelt is.
Weertschop un Infrastruktur
Hüdigendags is Padingbüddel tomeist Wohnoort. Bavenhen gifft dat en poor Bedrieven, de sik mit Bueree oder mit Handwark befaten doot. Vun 1993 af an steiht in de Gemeende ok in Windpark. Dor weert vun 10 Rotoren 4,8 Megawatt produzeert.
Lüde
- De eerste bekannte Minsch ut Padingbüddel weer Tjede Peckes. Se weer de Wuster Fresen ehr Fahnjumfer in de Slacht bi dat Wremer Deep gegen den Bremer Arzbischop.
- De Komponist Vincent Lübeck ut de Tiet vun dat Barock is 1654 in Padingbüddel boren wurrn.
- 1810 is Bernhard vun Langenbeck in den Oort boren.
- De Theoloog Johann David Schlichthorst is 1843 in Padingbüddel storven. He weer dor Paster un hett sien Leven lang gegen de Plattdüütsche Spraak streden. He meen, düsse Spraak weer Schuld, dat de Lüde dumm bleven un wull ehr geern utrieten un verbeden.
- 1907 is de Landraad von’n Landkreis Wersermünn un Versekerungshistoriker Ludwig Arps in Padingbüddel boren.
Footnoten
Weblinks
- private Websteed över Padingbüddel (hoochdüütsch)
Cappel |Dorum |Millm |Misselwarden |Mulsen |Noordholt |Padingbüddel |Wremen