Rechtenfleth
Rechtenfleth is en Dörp in de Gemeen Hagen in’n Landkreis Cuxhoben, Neddersassen. Binnen de Gemeen billt de Oort en egen polietsche Oortschop.
| Wapen/Flagg | Koort | |
|---|---|---|
|
| |
| Basisdaten | ||
| Flach: | 15,47 km² | |
| Inwahners: | 297 (27. November 2017) | |
| Inwahnerdicht: | 19,2 Inwahners pro km² | |
| Postleettall: | 27628 | |
| Vörwahl: | 04702 | |
| Geograafsche Laag: | 53° 23′ N, 8° 31′ O | |
 | ||
| ||
Bi Rechtenfleth höört ok de Hööv von Feldhoff, de Hoff Blömkenmoor un de Hüüs an’t Dreptersiel mit to.
Geografie
Rechtenfleth liggt in de Masch an dat rechte Över von de Ünnerwerser.
De Naveröörd sünd Deersdorp in’n Noorden, Neenlann un Swegen in’n Noordoosten, Driftseth in’n Oosten, Saanstermoor in’n Süüdoosten un Saans in’n Süden. Op de anner Sied von de Werser doot in’n Süüdwesten Schmalenfleth liggen, in’n Westen Sürwörden un Als un in’n Noordwesten Roonkarken.
Historie
De Oort kummt 860 toeerst in de Vita Willehadi vör, in de beschreven warrt, dat en Froo ut Rechtenfleth, de nich mehr lopen kunn, dör een von de Wunners an Willehad sien Graff wedder op de Been kamen is.
In’n Krieg von 1870/1871 sünd negen Soldaten ut Rechtenfleth fullen oder vermisst[1], in’n Eersten Weltkrieg 33 Soldaten un in’n Tweten 26.[2]
Verwaltungsgeschicht
In de Franzosentied von 1810 bet 1814 hett de Oort to de Mairie Weersbe in’n Kanton Dammhagen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
Dat Dörp hett vör 1885 to dat Amt Hagen tohöört un dor to Noord-Oosterstood. Na 1885 weer dat in’n Kreis Geestmünn. 1932 is dat Deel von’n Landkreis Wersermünn un 1977 von’n Landkreis Cuxhoben worrn.
In dat 20. Johrhunnert is de Oort Rechtenflethermoor, de vörher mit to Rechtenfleth höört hett, an de Gemeen Hagen wesselt un is vondaag Deel von de Oortschop Driftseth.
1968 is de Gemeen Rechtenfleth Deel von de Gemeen Saans worrn. To’n 1. Januar 2014 is de Gemeen Saans oplööst un Rechtenfleth Deel von de Gemeen Hagen worrn.[3] Dorbi is de vörherige Gemeen Saans in verscheden Oortschoppen opdeelt worrn, de nu wedder de Gemenen afbillt, so as se vör 1968 bestahn hebbt. Rechtenfleth billt sietdem en Oortschop mit egen Oortsvörsteiher.
Inwahnertall
| Johr | Inwahners |
|---|---|
| 1791[4] | 82 Füürsteden |
| 1812[5] | 431 |
| 1824[6] | 82 Füürsteden |
| 1848[7] | 484 Lüüd, 79 Hüüs |
| 1. Dezember 1871[8] | 329 Lüüd, 70 Hüüs |
| 1. Dezember 1885[9] | 354 Lüüd, 71 Hüüs |
| 1. Dezember 1905[10] | 350 Lüüd, 73 Hüüs |
| 1. Dezember 1910[11] | 391 |
| 1925[12] | 396 |
| 1933[12] | 348 |
| 1939[12] | 327 |
Religion
Rechtenfleth is evangeelsch-luthersch präägt un höört to dat Kaspel von de Johannes-de-Döper-Kark in Saans.
För de Kathoolschen is de Hillig-Hart-Jesu-Kark in Geestmünn tostännig.
Wapen
Dat Wapen von Rechtenfleth wiest op roden Grund över en grönen Schildfoot mit sülvern Wellenlien en sülvern Haal.
Oortsvörsteihers
- 1. Januar 2014–: Hardy Köhler (SPD)
Kultur
En Denkmaal för de Fullenen ut de twee Weltkrieg’ steiht op’n Karkhoff un een för de Fullenen ut’n Krieg 1870/1871 an’n Diek.
Bruukdom
To’n 1. Mai warrt in Rechtenfleth en Maiboom opstellt.
Weertschop un Infrastruktur
De freewillige Füürwehr Rechtenfleth is 1902 grünnt worrn.
Verkehr
Rechtenfleth liggt an de Kreisstraat 50, de in’n Noorden na Neenlann löppt un in’n Süden na Saans. Von de K 50 böögt na Westen de K 53 af, de na de Werserfähr henlöppt, de na Golzwarden geiht. De Autobahn 27 (Afsnidd Bremen–Bremerhoben) löppt so bi veer Kilometer in’n Oosten von Rechtenfleth langs. De nächste Opfohrt is de Opfohrt 12 Hagen.
De nächste Bahnhoff is so bi 15 Kilometer weg de Bahnhoff Lox an de Bahnlien Bremen–Bremerhoben.
Von September 1911 bet 1931 harr de Oort en egen Bahnhoff an de Nedderwerserbahn.
Scholen
De Oort harr fröher en egen Volksschool, de later aver dichtmaakt hett. In dat Gebüüd is vondaag de Speelkreis un de Füürwehr ünnerbrocht. De Kinner gaht nu op de Grundschool an de Staleek in Hagen.
Tourismus
Rechtenfleth is en Feernoort un hett en 7,2 Hektar groten Campingplatz an de Werser.
Lüüd
_b_208.jpg)
De Schriever Hermann Allmers is 1821 in Rechtenfleth boren un dor 1902 ok doodbleven. Ok de Schriever Erp Lindenbrog stammt ut Rechtenfleth.
Literatur
- Bernd Ulrich Hucker: Hermann Allmers und sein Marschenhof. Die Geschichte des Allmershofes und des Osterstader Dorfes Rechtenfleth in Beziehung zu Leben und Werk des Patrioten, Dichters und Gelehrten; mit einer Bibliographie seiner Werke. Ollnborg 1981, ISBN 3-87358-136-1
- Axel Behne: Das Haus des Dichters Hermann Allmers in Rechtenfleth an der Weser. Rechtenfleth 2001
- Hansdieter Kurth: Rechtenfleth - Die Geschichte eines alten Marschendorfes., Rechtenfleth 2009
- Felicitas Gottschalk: Hin nach Texas! Hin nach Texas! Hermann Joppert - ein Auswanderer als Soldat im Amerikanisch-Mexikanischen Bürgerkrieg 1846-1848. 1. Auflage 2012, ISBN 3-89995-870-5
Footnoten
Weblinks
- Infos över Rechtenfleth (plattdüütsch, hoochdüütsch, Esperanto)
Albst (mit Büggeln) |Braamst (mit Braamst, Braamstermoor, Bremerhorn, Finn, Finterbarg, Gackau, Harndorp, Loh un Wittst) |Dörphagen |Driftseth (mit Dannendörp, Rechtenflethermoor un Wittenbarg) |Hagen (mit Börsten un Harmonie) |Hein (mit Vosloog) |Hoop (mit Seelhorn) |Kassbrook (mit Grienenbargshusen un Kassbroker Heid) |Leernst (mit Born, Düngel, Neenhusen un Seedörp) |Offenwarden (mit Offenwardermoor) |Rechtenfleth (mit Blömkenmoor, Dreptersiel un Feldhoff) |Saans (mit Saanstermoor) |Uthleer (mit Cleve un Uthleererbarg) |Weersbe (mit Weersbermoor) |Wolsbuddel (mit Heesen un Woldar) |Wortfleet (mit Rechtebe un Rechtebermoor)