Wuhlenborg

Wuhlenborg liggt in de Masch von de Elv achter’n Diek von de Seev un dicht bi de Münn von de Seev in de Elv. In’n Süden reckt de Oort bet an’n Ashuser Möhlenbeek, de dor in de Seev münnt. In’n Süüdwesten von Wuhlenborg liggt dat Naturschuulrebeed Ünner Seevdaal.

De Naveröörd sünd Ossenwarder Elvdiek in’n Noorden, Fiefhusen in’n Noordoosten, Hoow, Rosenweid un Flegenbarg in’n Oosten, Achterdiek un Stell in’n Süden, Maschen un Hössen in’n Süüdwesten, Mäkelfeld un Brookdamm in’n Westen un Grootmoordamm, Over un Bullenhusen in’n Noordwesten.

Dat Riddergood in Wuhlenborg hett in de Midd von dat 18. Johrhunnert toeerst de Familie Schrader un denn de Familie Soltau tohöört. In de twete Hälft von dat 19. Johrhunnert hett dat denn de Familie Dobbeler övernahmen un in dat fröher 20. Johrhunnert de Familie Ast.

Verwaltungsgeschicht

Vör 1885 leeg Wuhlenborg in’t Amt Winsen un na 1885 in’n Kreis Winsen, de 1932 denn Deel von’n Landkreis Horborg worrn is.

1929 is de Gemeen Wuhlenborg Deel von de Gemeen Rosenweid worrn. An’n 1. Juli 1972 is Wuhlenborg mit de Gemeenreform in Neddersassen tohoop mit Rosenweid Deel von de Gemeen Stell worrn.

Inwahnertall

Religion

Wuhlenborg is evangeelsch-luthersch präägt un höört to dat Kaspel von de Martin-Luther-Kark in Flegenbarg. Bevör de Kark 1954 boot worrn is, hett de Oort bi dat Kaspel von de Marienkark in Winsen bihöört.

Verkehr

Wuhlenborg liggt an de Kreisstraat 1, de an’n Elvdiek langs in’n Süüdoosten na Rosenweid, Flegenbarg un Hoopt löppt un in’n Noordwesten as K 25 na Over un Bullenhusen. Na Süüdwesten an de Seev langs loopt Straten na Hössen un Achterdiek.

Na Noordoosten to is de Verkehr dör de Elv ganz afsperrt.

De nächsten Bahnhööv sünd de Bahnhoff Maschen un de Bahnhoff Stell an de Bahnlien Hamborg–Hannover.

• Wir an der Elbe. Chronik der Dörfer Achterdeich, Fliegenberg, Rosenweide und Wuhlenburg. Gemeen Stell, 1997