Адьырҕалар (киинэ)
Адьырҕалар (ааҥл. Predators) диэн Нимрод Антал 2010 сыллааҕы билим ыра сэриилээх киинэтэ. Сценаристара Алекс Литвак уонна Майкл Финч. Сүрүн оруоллары оонньууллар Эдриен Броуди, Тофер Грейс, Алисе Брага, Уолтон Гоггинс, Лоуренс Фишборн. Тарҕатааччы компания 20th Century Fox. Адьырҕа франшиза үһүс киинэтэ буолар. Киинэ бас геройа Ройс (Броуди), хамначчыт сэрииһит, өйдөнөн кэлбитэ парашутунан джунгли ойуурга түһэн эрэр. Бу ойуурга кини курдук идэлээх өлөрүөхсүттэр эмиэ быраҕыллан кэлбиттэр. Кинилэри барыларын уоран ылан манна туох эрэ соруктаах аҕалбыттарын сыыйа өйдүүллэр. Бу биллибэт планета икки өстөһөр Адьырҕа биистэрин бултуур сирдэрэ эбит.
Продюсер Роберт Родригес "Адьырҕа" серия үһүс киинэтин сценарийын 1994 сылга номнуо суруйбута, ол эрэн 20th Century Fox компания 2009 сылга биирдэ оҥкул үлэтин бигэргэппитэ. Киинэ уһулуута 2009 сыл балаҕан ыйын 28 саҕаланан баран 53 күнүнэн бүппүтэ. Уһулуу буолбут оруннара Хауайи уонна Остин Техас. Адьырҕалар Америкаҕа 2010 сыл от ыйын 9 тахсыбыта. Аан дойдутааҕы бүтүн кэлэбирдэрэ $127 млн. Критиктар сыанабыллара булкаас буолбут. Сэриилээх охсуһуулаах өрүттэрин хайҕаабыттар, ол эрэн персонажтарын ис хоһоонноро халымыр диэбиттэр.
Оруолларга
- Эдриен Броуди - Ройс, АХШ анал судуҥ күүстэрин бэтэрээнэ, кэнники хамначчыт сэрииһит буолбут
- Тофер Грейс - Эдвин, эмчит, бастаан көннөрү эйэлээх киһи курдук көстөр, кэлин биллибитэ иирээки өлөрүөхсүт эбит
- Алисе Брага - Изабель, Ыһыраайыл хаххал күүстэрин снайпера
- Уолтон Гоггинс - Стэнс, Сан Куэнтин түрмэ хаайыылааҕа. 38 киһини өлөрбүтүн иһин суутунан өлөрүүгэ анаммыта
- Олег Тактаров - Николай, нуучча Альфа бөлөх спецнаһын сэрииһитэ, уоруллуон иннинэ Чечняҕа сэриилэспитэ
- Лоуренс Фишборн - Ноланд, АХШ Бастакы Кавалерия дивизиятын саллаата, бу иннинэ манна хас да "булт эргиирин" ааспыта
- Дэни Трехо - Кучильо, Мексика Los Zetas наркокартелын өлөрүөхсүтэ
- Луис Одзава Чангчьен - Хандзо, Инагава-кай якудза кланын өлөрүөхсүтэ
- Махершала Али - Момбаса, Сьерра Леоне Revolutionary United Front сэрииһитэ