Тыыраахы

Тыыраахы эбэтэр ачаах кутурук, кыптыый кутурук (нууч. речная крачка, лат. Sterna hirundo) — өрүстэргэ, күөллэргэ олохсуйар көтөр. Тыыраахылар уустарыгар киирэр.

Өҥө үрүҥ, хара баттахтаах, кутуруга кыптыый курдук. Тумса сайын, саас кыһыл, сороҕор хара буолуон сөп. Атахтара кылгас буоланнар содьороҥноон хаамар.

Европаҕа (уһук хотуттан ураты), Сибииргэ, Орто Азияҕа, Киин Азия уонна Монголия сорох сирдэригэр уонна Хотугу Африкаҕа, Хотугу Америка илин өттүгэр тарҕаммыт көрүҥ.

Холуонньаларынан таас очуостарга эбэтэр кумахха уйаланар. Атыырдаах тыһы олохторун тухары бииргэ сылдьаллар (моногамия). Уу үрдүнэн көтө сылдьан кыра балыктары уонна уу үөннэрин умсан бултаһаллар.

Киниэхэ чугас уонна тас көстүүтүнэн майгынныыр көрүҥ — хотугу эбэтэр токок тыыраахы (полярная крачка). Бу көтөр хотугу полярнай эргимтэ таһыгар уйаланар (сорох ааптардар суруйалларынан ареалын соҕуруу кыраныыссата Дьокуускайга тиийэр). Ыйааһына көннөрү тыыраахытааҕар кыра буолар, ол оннугар кутуруга уһун.