Тыксаан

Тыксаан — остуолга оонньонор оонньуу.

1 см кэриҥэ диаметрдаах талаҕы 1,5 см уһуннаах гына кэрчиктээн, тэҥник хайытан, 50–60 тыксааны оҥороллор. Хас да киһи остуолу тула олорон уочаратынан оонньуур.

Тыксааны барытын, биир ытыска мунньан баран, остуол үрдугэр ыһа түһэрэллэр. Итини кутуу дэнэр. Кутуллубут тыксааннар араастык умса, тиэрэ, үрүт-үрдүлэригэр түһэллэр.

Икки тыксаан баттаһа, умса, тиэрэ түспүт буоллаҕына, ити тыксааннары куппут киһи хомуйан ылар уонна умса сытар тыксааны атын умса сытар тыксаанынан табардыы тыгыахтаах. Тыкпыт тыксаана таптаҕына уонна тыксааннары хамсаппатаҕына, тыкпыт тыксаанын ылар уонна салгыы оонньуур. Өскөтө кини сыыһа тыктаҕына эбэтэр атын тыксааны хамсаттаҕына, оонньуурун тохтотор, уочараттаах киһи саҥалыы кутар. Итинник тыксаан бүтүөр диэри оонньууллар. Элбэх тыксааны ылбыт киһи кыайар. Тыксааны аахпаттар. Оонньообут дьон ылбыт тыксааннарын иккилии тыксаанынан кэрийэ остуолга быраҕан иһэллэр. Ордук тыксааннаах хаалбыт оонньооччу кыайар.