Чарльз Лидбитер
Чарльз Лидбитер — Улуу Британия биллиилээх суруналыыһа, сүбэһит, аналиитик, экэниэмикэ эйгэтигэр саҥа-сонун сүүрэннэри киллэриигэр анаммыт хас даҕаны кинигэ ааптара. Кини 1980-с сыллардаахха “Ашока” кэмиэрчэскэйэ суох тэрилтэ төрүттээччитэ уонна бэрэссэдээтэ Билл Дрейтоны кытары аан дойдуга биир бастакынан “түмэт урбаан” диэн тиэрмини киэҥ эйгэҕэ киллэрбитэ.
Олоҕун олуктара
Чарльз Лидбитер 1959 сыллаахха Улуу Британияҕа төрөөбүтэ. Лидбитер карьератын 1980-с сыллардаахха Marxism Today-тан саҕалаан баран, кэлин Financial Times хаһыакка көспүтэ. Онно кини 10 сыл устата араас салааларга эрэдээктэринэн үлэлээбитэ, итиэннэ хаһыат Токиотааҕы бүрүөтүгэр шеф эрэдээктэр дуоһунаһын толорбута. Лидбитер суруналыыстыкаҕа үлэлиирин устата араас наҕараадаларга тиксибитэ, ол иһигэр аатырбыт хаһыат The New York Times наҕараадатыгар. Сүбэһит (консультант) быһыытынан BBC, Vodafone, Microsoft, Ericsson, Channel Four Television тэрилтэлэргэ, Шанхай куорат дьаһалтатыгар, Улуу Британия бырабыыталыстыбатыгар, Дьобуруопа Сойууһун Атыыга уонна бырамыысыланнаска министиэристибэтигэр үлэлээбитэ. Кылгас кэмҥэ Тони Блэргэ сүбэһиттээбитэ. Оттон Улуу Британия Independent хаһыатыгар эрэдээктэр көмлөһөөччүтүнэн үлэлии сылдьан аатырбыт “Бриджит Джонс дневнигин” оҥоһуутугар кыттыспыта.
Лидбитер бэйэтин үлэлэригэр кэпэрээссийэ уонна түмсүүлээх айар үлэ экэниэмикэ саҥа сайдыылаах моделин төрүтэ буолуохтаах диэн итэҕэтиилээхтик суруйар. Кинин санаатыгар, түмэт урбаанын сайдыытыгар интэриниэт төһүү буолуохтаах.
Билигин Чарльз Лидбитер Идиэйэ Аатлаһа (Atlas of Ideas) бырагыраамаҕа үлэлэһэр.