කෝතොකු-ඉන්
කෝතොකු-ඉන් (高徳院) යනුවෙන් හැඳින්නේනේ ජපානයේ කනගාවා ප්රාන්තයේ කාමකුරා නගරයේ පිහිටි ජෝදො-ෂූ නිකායයට අයත් බෞද්ධ විහාරස්ථානයකි.
මෙම විහාරය ප්රකට වී ඇත්තේ එහි පිහිටි "මහා බුද්ධ ප්රතිමාව" (大仏; දායිබුත්සු) හේතුවෙනි. අමිද බුදුන් වහන්සේ නිරූපිත මෙම එළිමහන් ලෝකඩ ප්රතිමාව ජපානයේ වඩාත් සුප්රකට සංකේත අතුරින් එකක් ලෙස ද සැලකේ.
මහා බුද්ධ ප්රතිමාව
කාමකුරාහි මහා බුද්ධ ප්රතිමාව ජපානයේ කනගාවා ප්රාන්තයේ කාමකුරා නගරයේ කෝතොකු-ඉන් විහාරයේ පිහිටි එළිමහන් ලෝකඩ බුද්ධ ප්රතිමාවකි. මෙම බුද්ධ ප්රතිමාව මගින් අමිතාභය බුදුන් වහන්සේ නිරූපණය වේ. විහාරයේ වාර්තා අනුව ලෝකඩ බුද්ධ ප්රතිමාව ක්රි.ව. 1252 කාමකුරා යුගයට අයත් යැයි සැලකේ. මෙම ලෝකඩ ප්රතිමාව ඉදි කිරීමට ප්රථම එතැන දැවැන්ත දැවමය බුද්ධ ප්රතිමාවක් පැවතී ඇත. එම දැමය ප්රතිමාව 1243දී නිමකෙරුණේ වසර දහයක අඛණ්ඩ කම්කරු දායකත්වය යටතේ ය. ඒ සඳහා අනුග්රහය සපයන ලද්දේ ඉනාඩා ආර්යාව (ඉනාඩා-නෝ-ට්සුබොනේ) සහ ටෝටෝමිහි ජෝකෝ නම් බෞද්ධ භික්ෂුව විසිනි. 1248 කුණාටුවක් හේතුවෙන් එම දැව බුද්ධ ප්රතිමාවට හානි සිදු විය. ප්රතිමාව වැඩ හිඳි ශාලාව ද විනාශ විය. මේ නිසා ජෝකෝ විසින් ලෝකඩයෙන් තවත් බුද්ධ ප්රතිමාවක් තැනීමට යෝජනා කරන ලදී. මේ සඳහා අතිවිශාල මුදල් ප්රමාණයක් අවශ්ය වූ අතර, ව්යාපෘතිය වෙනුවෙන් නව ශාලාවක් ද ඉදිකෙරිණි.[1] මෙම ලෝකඩ ප්රතිමාව එකල ප්රමුඛ පෙළේ ලෝකඩ නිර්මාණකරුවන් වූ[2] ඕනො ගොරෝඉමොන්[3] හෝ ටන්ජි හිසටොමෝ[4] විසින් නිර්මාණය කරන්නට ඇතැයි සිතිය හැක. එක්තරා කාලයක දී ප්රතිමාවේ රන් ආලේපිත කොට තිබිණි. ප්රතිමාවේ දෙකන් අසල තවමත් රන් පත්රවල සලකුණු දැකගත හැක.[5]
1334 කුණාටුවක් හේතුවෙන් ශාලාව විනාශ විය. එය නැවත ඉදිකළ ද, 1369දී කුණාටුවක් හේතුවෙන් යළි එය විනාශ විය. අනතුරුව එය නැවත ඉදිකෙරිණි.[1] මෙම ප්රතිමාව වටා අවසන් වරට ඉදිකොට තිබූ ගොඩනැගිල්ල මුරොමචි යුගයේ 1498 සැප්තැම්බර් 20 දින ඇතිවූ සුනාමිය හේතුවෙන් විනාශයට පත් විය.[6] එතැන් සිට මහා බුද්ධ ප්රතිමාව විවෘත එළිමහනේ වැඩහිඳියි.[6]
පාදම ද ඇතුළුව මෙම ප්රතිමාව ආසන්න වශයෙන් මීටර 13.35 (අඩි 43.8) පමණ උසින් යුක්ත ය.[7] ප්රතිමාවේ බර ටොන් 93ක් පමණ වේ. ප්රතිමාව කුහරමය ආකාරයෙන් තනා ඇති අතර, නරඹන්නන් හට ප්රතිමාවේ ඇතුළත දසුන ද නැරඹිය හැක. වසර ගණනාවක් පුරා පැමිණි සංචාරකයින් විසින් ප්රතිමාවේ ඇතුළත කුරුටු ලේඛන සටහන් කොට ඇත.[8] එක්තරා කාලයක දී, ප්රතිමාවේ පාදමේ ලෝකඩ නෙළුම් පෙති තිස් දෙකක් විය. නමුත් වර්තමානය වන විට ශේෂව ඇත්තේ ඉන් සතරක් පමණක් වන අතර, සෙසු කොටස් දක්නට නැත.[9] භූමිය වෙත පිවිසෙන ස්ථානයෙහි අන්තර්ගත දැන්වීමෙහි මෙසේ සඳහන්ව ඇත: "ආගන්තුකය, නුඹගේ ශිල්පය කුමක් වුවත්, කුමන ඇදහිල්ලකට අයත් වුවත්, මෙම අභයභූමියට පිවිසෙන නුඹ යුග ගණනාවක් පුරා වන්දනාමානයට පාත්ර වූ භූමියක පය තබන බව අමතක නොකරන්න. මෙය බුදුන්ගේ විහාරයක් වන අතර, සදාතනිකත්වයේ ද්වාරය ද වේ. මේ නිසා ඇතුළු විය යුත්තේ ඉමහත් ගෞරවයෙන් යුතුව ය."[10]
1923 මහා කැන්ටෝ භූමිකම්පාව හේතුවෙන් ප්රතිමාව වැඩහිඳින පාදමට හානි සිදු විය. නමුත් 1925දී පාදම ප්රතිසංස්කරණය කෙරිණි.[1] භූමිකම්පාවලින් ප්රතිමාවට සිදුවිය හැකි හානි වළක්වා ගැනීම සඳහා 1960-61 අතර කාලයේ ප්රතිමායේ ප්රතිසංස්කරණ කටයුතු සිදුවූ අතර, ගෙළ ප්රදේශය ශක්තිමත් කිරීම ද සිදු විය.[1]
2016 මුල් කාලයේ, ප්රතිමාව පිළිබඳ වැඩිදුර පර්යේෂණ, ප්රතිසංස්කරණ සහ සංරක්ෂණ වැඩ කටයුතු ක්රියාත්මක විය.[11]
ලක්ෂණ
- බර: ටොන් 121 (රාත්තල් 267,000)[12]
- උස: මීටර 13.35 (අඩි 43.8)
- මුහුණේ දිග: මීටර 2.35 (අඩි 7 අඟල් 9)
- ඇසෙහි දිග: මීටර 1.0 (අඩි 3 අඟල් 3)
- මුඛයේ දිග: මීටර 0.82 (අඩි 2 අඟල් 8)
- කනෙහි දිග: මීටර 1.90 (අඩි 6 අඟල් 3)
- එක් දණක සිට අනෙක් දණට දිග: මීටර 9.10 (අඩි 29.9)
- මහපටැඟිල්ලෙහි පරිධිය: මීටර 0.85 (අඩි 2 අඟල් 9)
රඩ්යාර්ඩ් කිප්ලිංගේ කාව්යය
රඩ්යාර්ඩ් කිප්ලිංගේ කිම් (1901) නවකථාවේ පූර්විකාවේ ආරම්භක පරිච්ඡේදයන්හි "කාමකුරා බුද්ධ ප්රතිමාව" පිළිබඳ පැදි කිහිපයක් ඇතුළත් ය. මෙම පැදි උපුටාගන්නා ලද්දේ 1892දී කතුවරයා විසින් කාමකුරා නැරඹීමෙන් පසු එම නාමයෙන්ම රචිත පැදි පෙළකිනි.[13] මෙම කවිය 1903 "The Five Nations" තුළ සම්පූර්ණයෙන්ම ඇතුළත් කොට ඇත.[13]
ගැලරිය
- කාමකුරා බුද්ධ ප්රතිමාවේ ප්රමාණය සැසඳීම සඳහා පරෙවියකු සමග සමීප දසුනක්.
- විවෘත කවුළු සහිත ප්රතිමාවේ පසුපස පෙනුම
- බුද්ධ ප්රතිමාවේ පාවහන්
- මහා බුද්ධ ප්රතිමාවේ ඇතුළත පෙනුම
- මහා බුද්ධ ප්රතිමාවේ ඉදිකිරීම් තාක්ෂණය විස්තර කෙරෙන එම ස්ථානයේ පිහිටුවා ඇති ඵලකයක්
මේවාත් බලන්න
- ජපන් බුදු දහම පිළිබඳ ශබ්ද මාලාව - ජපන් බුදු දහම, ජපන් බෞද්ධ කලාව සහ ජපන් බෞද්ධ ගෘහනිර්මාණ ශිල්පය පිළිබඳ පාරිභාෂික වචන පිළිබඳ පැහැදිළි කිරීමකි.
- ජපානයේ ජාතික වස්තූන් ලැයිස්තුව (ප්රතිමා)
- ටියෑන් ටෑං බුද්ධ ප්රතිමාව - හොං කොංහි පිහිටි මෙය ලොව උසම හිඳි බුද්ධ ප්රතිමාවයි.
- තෝදයි-ජි - නාරාහි මෙම විහාරය තුළ ජපානයේ විශාලතම ලෝකඩ බුද්ධ ප්රතිමාව දැකගත හැක.
- උසිකු දායිබුත්සු - ජපානයේ ඉබරාකි ප්රාන්තයේ උෂිකුහි පිහිටි මෙය ජපානයේ උසම බුද්ධ ප්රතිමාව වේ.
ආශ්රේයයන්
බාහිර සබැඳි
- කෝතොකු-ඉන් ප්රධාන පිටුව සංරක්ෂණය කළ පිටපත 2010-12-03 at the Wayback Machine (ඉංග්රීසි බසින්)
- කාමකුරා ටුඩේ වෙබ්අඩවිය සංරක්ෂණය කළ පිටපත 2012-06-07 at the Wayback Machine "කෝතොකු-ඉන් (මහා බුද්ධ ප්රතිමාව)" පිටුව
- කාමකුරා සංචාරය වෙබ්අඩවිය සංරක්ෂණය කළ පිටපත 2016-10-25 at the Wayback Machine "කාමකුරා දයිබුත්සු (කාමකුරාහි මහා බුද්ධ ප්රතිමාව)" පිටුව (ඉංග්රීසි බසින්)
සැකිල්ල:Daibutsu
සැකිල්ල:Buddhist temples in Japan 139°32′09″E / 35.31684°N 139.53573°E