同盟國（第二次世界大戰）

同盟國，也叫反法西斯同盟，是第二次世界大戰爆發過後，部分國家（阿末有57個，當中5個從軸心國脫離）為仔抵抗軸心國個侵略組成個聯盟，也是搭軸心國對立個陣營。同盟國組成搭參加盟軍個國家大多數是因為受著軸心國個武力侵略，或者是生怕軸心國會得控制整個世界。^[1]

最早開始打仗個辰光（1939年9月1日），反德同盟包括仔法國、波蘭搭英國，嘸沒幾化辰光英國個自治領（澳大利亞、加拿大、紐西蘭、紐芬蘭自治領搭南非聯邦）^[2]儕加入仔同盟。1941年珍珠港事變過後，美國搭中國加入同盟國。同時辰光，1941年過後英聯邦、美國搭蘇聯個領導人畀大家叫「三巨頭」，做仔同盟國個領導角色^[3]。從1937年個盧溝橋事變開始，中國就一直勒搭日本打仗，勒箇歇辰光也是重要個盟友，中國戰場浪牽制仔大部分日本陸軍，還參加仔緬甸戰場幫英軍個忙^[4][5]。中國搭三巨頭（英國、美國、蘇聯）畀美國總統富蘭克林·德拉諾·羅斯福叫「世界權力個託管人」，後歇來叫同盟國個「四警察」或者「四大國」^[6][7]。蘇美英中四大國頂早勒《聯合國共同宣言》浪簽字，^[8]後歇來勒1943年個莫斯科會議頒布個《四國普遍安全宣言》裏向「四大國」地位得著進一步確認^[9]。其他盟國包括比利時、巴西、捷克斯洛伐克、埃塞俄比亞、希臘王國、英属印度、墨西哥、荷蘭、挪威搭南斯拉夫等。^[10]

勒1941年12月，美國總統羅斯福幫同盟國設計仔一個名字，叫「聯合國」。後歇來勒1942年1月1號簽個《聯合國共同宣言》，成為仔現代联合国個基礎。^[11]勒1945年7月個波茨坦會議浪，羅斯福個接班人哈里·S·杜魯門總統向中、法、蘇、英、美個外長提出來各國應該「商量一隻和平條約搭歐洲國家邊界個解決方法」，就此讓外長理事會建立起來。