在日本朝鮮人總聯合會

 在日本朝鮮人總聯合會（粵拼：zoi6 jat6 bun2 ziu1 sin1 jan4 zung2 lyun4 hap6 wui6*2）（朝鮮文：在日本朝鮮人總聯合會재 일본 조선인 총련합회，馬賴式轉寫：Chae Ilpon Chosŏnin Ch'ongnyŏnhaphoe；日文：在日本朝鮮人総聯合会ざいにほんちょうせんじんそうれんごうかい，拉丁轉寫：Zai-Nihon Chōsenjin Sōrengōkai）係居留日本嘅北朝鮮人嘅團體。

1945年結成嘅在日本朝鮮人聯盟畀駐日盟軍總司令以「暴力主義團體」嘅名義解散咗之後，喺1955年由在日朝鮮統一民主戰線新設呢個會。呢個會簡稱朝鮮總聯（ziu1 sin1 zung2 lyun4；朝鮮文：조선총련／朝鮮總聯），乃至直接嗌總聯（zung2 lyun4；朝鮮文：총련／總聯）。而喺日本啲報道度習慣用簡稱，不過寫成朝鮮總連（ziu1 sin1 zung2 lin4；日文：朝鮮総連／ちょうせんそうれん）^[1]。而因爲呢個會係北朝鮮人團體，所以喺南韓嗌呢個會做朝總聯（ziu1 zung2 lyun4；韓文：조총련／朝總聯）。

呢個會係無法人地位嘅非法人團體（日文：権利能力なき社団）。朝鮮總聯嘅主席兼幾位幹部都係北朝鮮嘅代議員^[2]。由於過去佢原先一啲成員係土台人（喺日本嘅北朝鮮間諜），呢個會同朝鮮半島問題有比較大嘅關涉，諸如文世光事件、祖國防衛隊事件都有涉嫌，所以日本嘅公安調查廳基於《破壞活動防止法》將呢個會定爲調查對象團體^[3]。