城際火車

中華人民共和國

1997年，中國鐵道部實施「提速」。六次提速之後，大量嘅特快火車、直達火車開始運行。尤其係2007年第六次提速後，鐵道部開行「和諧號」動車組，時速可以去到200公里以上。另外，其他嘅城際火車重有：

• 直達特快列車：車次代號係Z，車輛用25T型客車。大部分都係兩個站之間唔停站嘅火車，少數嘅直達特快列車中途會停靠某啲車站。大部分用東風11G柴油機車同韶山9G電力機車牽引，最高時速160公里。
• 特快列車：車次代號係T，剩係停少數大站，用25K型客車，用呢個車型嘅特快列車最高時速140公里。
• 快速列車：車次代號係K，停站比特快列車多啲。用25G型客車，最高時速120公里。
• 普快列車：車次用四位數字組成，營運距離長短不一，可以分做空調普快同非空調普快兩種。空調普快車費比非空調車貴。喺大陸，因為非空調普快列車成日用綠色嘅22型客車或者係25B型客車，所以又比人叫做「綠皮」。最高速度都可以去到120公里，但係始終多啲停站，所以比起上面幾種車種要行耐啲。

另可參閱：

• 中國高速鐵路
• 中華人民共和國鐵路客運
• 中華人民共和國鐵路運輸

台灣

台灣嘅城際火車可以分做兩個部分。

• 傳統鐵路（台鐵）
  • 自強號：用E1000型推拉式電車、電聯車、柴聯車運行，係台鐵最高等級嘅城際火車。最高時速去到110～130公里。
  • 復興號：用電力機車或者係柴油機車牽引客車運行。最高時速110公里。
  • 莒光號：用電力機車或者係柴油機車牽引客車運行。最高時速100公里。（客甲B速／E客甲B速）
  • 太魯閣號：用TEMU1000式擺式列車運行，主要喺東部幹線嘅電化區間度行，收自強號票價嘅錢。呢種車過彎速度比現時所有台鐵火車都快。最高時速130公里。

• 高速鐵路
  • 而家用緊日本新幹線700系做基礎嘅台灣高鐵700T型電聯車運行。喺台北去高雄最快只係要1個鐘7個字，最高營運時速係315公里。

另可參閱：

• 台灣鐵路運輸
• 對號列車

日本

• 新幹線：日本最重要嘅城際運輸系統就係新幹線系統。新幹線係全世界第一個高速鐵路城際運輸系統。而家已經有東海道新幹線、山陽新幹線、東北新幹線、上越新幹線、長野新幹線同埋九州新幹線。迷你新幹線方面就有山形新幹線同秋田新幹線等嘅路線。而且新幹線有自由席，唔對號嘅車票，可以搭是但一班，自己搵位坐，就好似捷運咁。
• 在來線：日本在來線（1067軌距嘅窄軌路線）有好多嘅特急列車喺度行。連結日本幾個主要嘅大城市。其中特別嘅有北越急行嘅白鷹列車，用681系同埋683系電車運行，可以去到時速160公里，係世界上1067mm窄軌運行速度最快嘅。