普及社區檢測計劃
普及社區檢測計劃（英文：Universal Community Testing Programme，簡稱UCTP）係香港政府響2020年武漢肺炎疫情下搞嘅一場全民自願免費嘅檢測，希望可以掌握武漢肺炎嘅社區感染情況，盡快搵出「隱性患者」，切斷社區傳播鏈。任何無病徵由揸住有效香港身份證嘅人都可以網上預約參加，響指定時段去到指定嘅社區檢測中心由醫護人員採集鼻腔同咽喉嘅拭子樣本，3日內就有檢測結果。
計劃響2020年9月1號開始，有141個檢測中心，原訂9月7號完。之後計劃延長至9月11號，檢測中心數量減至122個。其後計劃再延長至9月14號，檢測中心數量減至57個。
質疑
社會對普及社區檢測計劃有唔少質疑嘅聲音，譬如響無居家令配合下檢測成效大減，亦有人擔心當局趁機收集檢驗者嘅DNA資料[3]，同時有區議員批評全民檢測中心選址太近民居，又無做諮詢[4]。不過，當局唔認同呢啲反對論點[5]。
事故
喺9月7號，有一個44歲男人透過全民檢測被驗出呈陽性，但係送院再驗嗰陣時就呈陰性。呢個係今次計劃發生嘅第一單「假陽性」[6]。醫務化驗師梁啟維指，為咗加快化驗速度，有份接受政府委託做化驗嘅火眼實驗室用「3合1」混合樣本方法，由於用混合樣本化驗，喺覆檢嗰陣時有可能被過分稀釋，判斷唔到係陽性定陰性，所以由醫院再次收集病人呼吸道樣本化驗，證實火眼實驗室驗出「假陽性」。佢認為，只要檢測量大，就一定會出現「假陽性」，加上火眼實驗室用咗比較寬鬆嘅陽性結果標準，相信「假陽性」陸續有來[7]。
