深圳河
深圳河（Sham Chun River）響香港同深圳之間，係兩地最長嘅河，係香港同中國大陸嘅邊界。因為係邊界關係，條河畀鐵絲網圍住，唔畀人自由出入。
呢條河自1898年簽署《展拓香港界址專條》起，係作為租借香港新界部份99年嘅界限。而呢條河係位於香港北區同中國廣東省深圳市之間。佢嘅源頭喺深圳市梧桐山，最後進入香港米埔附近嘅后海灣（深圳灣）。
源
深圳河因為定義做界河，所以沿邊界推上，去到深圳五廟地，河同邊界就分開，另一邊係香港蓮麻坑路，近伯公坳。伯公坳東谷係沙頭角河其中一個源頭，而坳西谷係深圳河其中一個源頭，佢地夾埋就係新界地界。邊界向東搵沙頭角河支流，而深圳河就沿五廟地上，水就係來自豆腐頭呢座山，就係界河嘅源頭[1]。而深圳河蓮塘邊界一段，由沙灣河口計，向上游嘅12000米，亦都叫蓮塘河，所以一般都話起自梧桐山[1]。
如果唔理界河定義，流入深圳河嘅有蓮塘河，深圳一邊有沙灣河、布吉河、福田河、皇崗河，香港一邊有梧桐河同平原河。其中沙灣河就最長，有20900米，所以以長計，深圳河其實起響布吉同平湖交界嘅牛尾嶺[1]。
治理
香港政府搞過深圳河治理工程，一共分三期，主要係想減少北區雨季水浸，其次係改善水質，家下做好晒。[2]因為河道拉直，港深兩地交換咗部份土地，當中包括響皇崗口岸東面，原來係落馬洲河套劃入香港境內[3]。
